"მის ნიჭს ცოტა თუ შეედრება" - ჩაკვეტაძე ჩემპიონშიფის საუკეთესო შემტევებს შორის მოხვდა
5 საათის წინ
ქართული სპორტი
1 წთ
ბრიტანული საფეხბურთო მედია საშუალება footballleagueworld ინგლისის ჩემპიონშიფში მოთამაშე 14 საუკეთესო შემტევი ნახევარმცველის შესახებ სტატიას აქვეყნებ და ამ სიაში მე-9 ადგილზე საქართველოს ნაკრების წევრს, გიორგი ჩაკვეტაძეს ასახელებს.
"მხოლოდ ნიჭის თვალსაზრისით, გიორგი ჩაკვეტაძე, სავარაუდოდ, სიაში ყველაზე ნიჭიერი ფეხბურთელია. მისი ტექნიკური დონე შესანიშნავია და ის უდავოდ საუკეთესო დრიბლიორია ამ სიაში. გასულ წლებში ტრავმები მომრავლდა, მაგრამ მას შეუძლია მცველებისთვის გვერდის ავლა, როდესაც საუკეთესო ფორმაშია. ჩაკვეტაძის ზუსტი კონტროლი და სისწრაფე მას საშუალებას აძლევს ბურთი ვიწრო სივრცეებშიც გადაიტანოს, რაც იმას ნიშნავს, რომ ხშირად შეუძლია დაცვა მყისიერ შეტევად გარდაქმნას.
ჩაკვეტაძის თამაშში არის ისეთი ნიჭი, რომელთან შედარებაც ცოტას შეუძლია. როდესაც ის სრული დატვირთვით თამაშობს, მისი შეჩერება წარმოუდგენლად რთულია. მას უოტფორდში გოლებისა და საგოლე პასების რაოდენობა აკლია და თანმიმდევრულობა კვლავ გასაუმჯობესებელი სფეროა, მაგრამ სუფთად, მხოლოდ უნარების თვალსაზრისით, ჩაკვეტაძე გამოირჩევა, როგორც დივიზიონის ერთ-ერთი ყველაზე საინტერესო შემტევი ნახევარმცველი", - წერს footballleagueworld.
26 წლის ქართველ ფეხბურთელს ამ სეზონში უოტფორდის შემადგენლობაში 27 მატჩში აქვს მონაწილეობა მიღებული და 3 საგოლე პასი გაკეთებული. მისი და საბა გოგლიჩიძის გუნდი ინგლისის ჩემპიონშიფში 43 ტურის შემდეგ დაგროვებული 57 ქულით მე-14 პოზიციას იკავებს და შემდეგი მატჩი 21 აპრილს, ვესტ ბრომვიჩთან უნდა გამართოს.
სხვა სტატიები
