ჰაიდენჰაიმის მწვრთნელი: "ბუდუ ბაიერნთან ვერ ითამაშებს"

საქართველოს ნაკრების ცენტრალური ფორვარდი, ბუდუ ზივზივაძე გერმანიის ბუნდესლიგაში, ამ ქვეყნის ყველაზე ტიტულოვან გუნდთან მატჩში ვერ ითამაშებს. ტრავმის გამო, ბუდუ ზივზივაძე მიუნხენის "ბაიერნთან" 30-ე ტურის შეხვედრაში მონაწილეობას ვერ მიიღებს.

31 წლის ფეხბურთელმა ტრავმა 29 მარტს, "ვოლფსბურგთან" მოგებულ მატჩში მიიღო, რის შემდეგაც, ლევერკუზენის "ბაიერთან" და ფრანკფურტის "აინტრახტთან" შეხვედრებში ვერ ითამაშა, ახლა კი მისი მოედანზე დაბრუნება სავარაუდოდ, შემდეგ ტურამდე გადაიდო.

ბუდუ ზივზივაძეს "ჰაიდენჰაიმში" გადასვლის შემდეგ, გერმანიის ბუნდესლიგის 12 მატჩში 2 გოლი აქვს გატანილი და 3 საგოლე პასი გაკეთებული.