ევროპის ჩემპიონატის წილისყრა შედგა | ქართველების საშეჯიბრო ბადეები და სავარაუდო მეტოქეები ცნობილია

თბილისში ევროპის ჩემპიონატის დაწყებამდე 1 დღე დარჩა. საქართველოს დედაქალაქი 16-19 აპრილს კონტინენტის პირველობას უმასპინძლებს, რომელიც თბილისის ახალ სპორტის სასახლეში გაიმართება.

რამდენიმე წუთის წინ, სასტუმრო პულმანში ევროპის ჩემპიონატის წილისყრა გაიმართა, სადაც ქართველების საშეჯიბრო ბადეები და სავარაუდო მეტოქეები გაირკვა - გთავაზობთ წილისყრის შედეგებს.

60 კგ

60 კგ-ში, საქართველოს ნაკრების ღირსებას მოქმედი ევროპის ჩემპიონი - გიორგი სარდალაშვილი დაიცავს.

გიორგი სარდალაშვილი B ბადეში განთესილი იქნება, შესაბამისად ასპარეზობას მეორე რაუნდიდან დაიწყებს, სადაც მეტოქეს დაელოდება. 1/4-ფინალში გასვლის შემთხვევაში, გიორგი სარდალაშვილის მეტოქე, ბელგიელ - ჟორე ვერსტრაეტენსა და ესპანელ - ფრანცისკო გარიგოსს შორის გამარჯვებული იქნება.

66 კგ

66 კგ-ში საქართველოს დროშის ქვეშ - ვაჟა მარგველაშვილი იჭიდავებს.

ვაჟიკო C ბადეში მიიღებს მონაწილეობას, სადაც სამწუხაროდ განუთესავი იქნება, შესაბამისად პირველივე რაუნდიდან იწყებს ასპარეზობას, სადაც ხორვატი მეტოქე - დანი კლასარი ეყოლება. ხორვატული ბარიერის დაძლევის შემთხვევაში, მარგველაშვილის მეტოქე, ფრანგი - ვალიდ ხიარი იქნება.

73 კგ

73 კგ წონითი კატეგორია გაორებული გვაქვს, სადაც - მიხეილ ბახბახაშვილი და ლაშა შავდათუაშვილი იასპარეზებენ.

ლეგენდარული ლაშა შავდათუაშვილი B ბადეში განთესილია, შესაბამისად მეორე ეტაპიდან იწყებს ასპარეზობას, სადაც ფინურ-კვიპროსულ დაპირისპირებაში გამარჯვებულს დაუპირისპირდება. უნდა აღინიშნოს, რომ ლაშას საკმაოდ კარგი ბადე აქვს იმისათვის, რომ წარმატებაზე იფიქროს.

რაც შეეხება მიხეილ ბახბახაშვილს, მიხეილი D ბადეში განუთესავია და ასპარეზობას პირველივე ეტაპიდან იწყებს, სადაც უნგრელ - დანიელ ჟეგადს დაუპირისპირდება. უნგრული ბარიერის დაძლევის შემთხვევაში, ბახბახაშვილის მეტოქე, ჩეხი - ჩუსნიდირ კარიმოვი იქნება.

81 კგ

81 კგ წონით კატეგორიაში 3-გზის ევროპის ჩემპიონი - ტატო გრიგალაშვილი იჭიდავებს.

3-გზის ევროპის ჩემპიონი - ტატო გრიგალაშვილი C ბადეშია განთესილი, სადაც ასპარეზობას მეორე რაუნდიდან დაიწყებს და ავსტრიელ - მოგამედ ბორჩაშვილს შეხვდება.

უნდა აღინიშნოს, რომ ტატო გრიგალაშვილს ძალიან კარგი ბადე აქვს და 1/2-ფინალამდე საკმაოდ მარტივად უნდა მივიდეს. ასევე უნდა აღვნიშნოთ, რომ ტატოსა და ტიმურ არბუზოვის (მოქმედი ევროპის ჩემპიონი) გზა ფინალამდე არ იკვეთება.

90 კგ

'ქართულ წონად' წოდებულ 90 კგ-ში ტრადიციული დუეტი გვეყოლება - ლაშა ბექაური და ლუკა მაისურაძე.

2-გზის ოლიმპიური და ევროპის ჩემპიონი - ლაშა ბექაური, A ბადეშია განთესილი, სადაც ასპარეზობას მეორე ეტაპიდან იტალიელ - კენი კომი ბედელთან დაიწყებს (ეს ის ძიუდოისტია, რომელმაც მსოფლიო ჩემპიონატზე ბექაური მეორე რაუნდში დაამარცხა).

რაც შეეხება ლუკა მაისურაძეს, ლუკა C ბადეში განთესილია და მეორე რაუნდიდან დაიწყებს ასპარეზობას, სადაც ბელგიელ და ისრაელელ სპორტსმენებს შორის გამარჯვებულს შეხვდება.

100 კგ

100 კგ-ში საქართველოს ნაკრების ღირსებას, მოქმედი ევროპის ჩემპიონი - ილია სულამანიძე დაიცავს.

ილია სულამანიძე D ბადეში პირველივე რაუნდიდან ჩაერთვება საქმეში, სადაც ბრიტანელ - ოლივერ ბარატს შეხვდება. ყველაზე ძლიერი მეტოქე, ვინც მას ბადეში ჰყავს, რუსი - ნიაზ ბილალოვია.

+100 კგ

მძიმე წონაში 2-გზის ევროპის ჩემპიონი - გურამ თუშიშვილი იჭიდავებს.

თუშიშვილი C ბადეშია განთესილი და მეორე ეტაპიდან ერთვება საქმეში, სადაც კვიპროსულ - უკრაინულ დუელში გამარჯვებულს ელოდება. 1/4-ფინალში გასვლის შემთხვევაში კი, თუშიშვილის მეტოქე, თურქი - იბრაჰიმ ტატაროღლუ იქნება.

48 კგ

48 კგ-ში საქართველოს დროშის ქვეშ - ჯულიეტა როდონაია იასპარეზებს.

21 წლის ჯულიეტა უმძიმეს ბადეში მოხვდა. იგი A ბადეშია განთესილი, სადაც პირველივე რაუნდში, ფრანგ - შირინ ბუკლის დაუპირისპირდება.

52 კგ

52 კგ-ში იჭიდავებს 19 წლის - ნინო თათრიშვილი.

19 წლის ნინო თათრიშვილი D ბადეშია განუთესავი, სადაც პირველივე რაუნდში ესტონელ - დარია მიჰაილოვას შეხვდება. ესტონური ბარიერის დაძლევის შემთხვევაში კი, მისი მეტოქე, უნგრელი - როზა გიერტიასი იქნება.

57 კგ

57 კგ-ში ტრადიციული დუეტი გვეყოლება - ნინო ლოლაძე და ეთერ ლიპარტელიანი.

მოქმედი ევროპის ვიცე-ჩემპიონი - ეთერ ლიპარტელიანი A ბადეშია განთესილი, სადაც მეორე ეტაპიდან იწყებს ასპარეზობას და მისი მეტოქე, ნორვეგიელი - ელის ბიორეასი იქნება. უნდა აღინიშნოს, რომ ეთერს საკმაოდ კარგი ბადე აქვს და ძიუდოს ექსპერტების აზრით, იგი ჩემპიონობის ერთ-ერთი მთავარი ფავირიტია.

რაც შეეხება ნინო ლოლაძეს, ნინო D ბადეშია განთესილი და პირველივე ეტაპზე, უძლიერეს ძიუდოისტს - ტიმნა ნელსონ ლევის შეხვდება.

63 კგ

63 კგ წონით კატეგორიაში იასპარეზებს ნინო წიკლაური.

C ბადეში იასპარეზებს ნინო წიკლაური, რომელიც პირველივე რაუნდიდან დაიწყებს ასპარეზობას და პოლონელ - ნატალია კროპსკას შეხვდება, მისი დამარცხების შემთხვევაში კი, იტალიელ - ჩარლოტა ავანზატოს დაუპირისპირდება.

70 კგ

70 კგ წონითი კატეგორიაც გაორებული გვაქვს, სადაც ნინო გულბანი და მარიამ ჭანტურია იჭიდავებენ.

ნინო გულბანი A ბადეში იასპარეზებს, სადაც პირველივე რაუნდში, გერმანელ - სამირა ბოკს შეხვდება, მისი დამარცხების შემთხვევაში კი, იტალიელ - ირენე პედროტის დაუპირისპირდება.

რაც შეეხება მარიამ ჭანტურიას, მარიამი C ბადეშია განთესილი და მეორე ეტაპიდან იწყებს ასპარეზობას, სადაც უნგრელ - სზოფი ოზბასს შეხვდება.

+78 კგ

მძიმე წონაში იჭიდავებს სოფიო სომხიშვილი.

სოფიო განთესილია და B ბადეში მეორე ეტაპიდან იწყებს ასპარეზობას, სადაც ხორვატ - ჰელენა ვუკოვიჩს შეხვდება, 1/8-ფინალში გასვლის შემთხვევაში კი, იტალიელ - ასია ტავანოს დაუპირისპირდება.

წინასაწარი შეხვედრები თბილისის დროით 10:30, ფინალური ბლოკი კი 16:00 საათზე დაიწყება.