ზედიზედ მეორედ: ოთარ კიტეიშვილი ავსტრიაში სეზონის საუკეთესო ფეხბურთელად დაასახელეს

საქართველოს ნაკრების ვიცე-კაპიტანი, ოთარ კიტეიშვილი ავსტრიის ბუნდესლიგის სეზონის საუკეთესო ფეხბურთელი გახდა.

ქართველი ნახევარმცველი ავსტრიის ჩემპიონატის საუკეთესო ფეხბურთელად ზედიზედ მეორე სეზონში დაასახელეს.

პრესტიჟული ჯილდო 29 წლის ქართველმა ფეხბურთელმა ავსტრიის ჩემპიონატის მონაწილე გუნდების მთავარი მწვრთნელების, მენეჯერებისა და პრეზიდენტების გამოკითხვის შემდეგ მიიღო.

ქართველი ფეხბურთელი 12 გატანილი გოლით ავსტრიის ჩემპიონატის ბომბარდირთა დავაში მეორე პოზიციას იკავებს და ლიდერ რონივალდოს 2 გოლით ჩამორჩება.

ოთარ კიტეიშვილის გუნდი ჩემპიონატის ლიდერია და უახლოეს მდევარს 3 ქულით უსწრებს, ჩემპიონატში კიდევ 2 ტურია დარჩენილი და "შტურმს" სტუმრად, ვენის "რაპიდთან" და შინ "ვოლფსბერგერთან" მატჩი აქვს სათამაშო.