"შენგელიამ და რიდმა უმაღლესი დონის მატჩი ჩაატარეს" - ვილი ერნანგომესი

საქართველოს კალათბურთელთა ეროვნულმა ნაკრებმა თბილისში მორიგი სანახაობრივი მატჩი ჩაატარა, რომელშიც ესპანეთი დაამარცხა.

საქართველო მსოფლიო ჩემპიონატის საკვალიფიკაციო მატჩში ესპანეთთან გარკვეული დროის განმავლობაში 22 ქულითაც კი მარცხდებოდა, მაგრამ მე-4 პერიოდში გარდატეხა შეიტანა და შეხვედრა ჯერ ოვერტაიმში (83:83) გადაიყვანა, შემდეგ კი 91:89 გაიმარჯვა.

ეროვნული ნაკრების გამარჯვებაში ლომის წილი თორნიკე შენგელიამ და მარკის რიდმა დაიდეს - შენგელიამ 37 ქულა, 10 მოხსნა და 2 ასისტი გაიფორმა, რიდმა კი 32 ქულასთან ერთად, 3 მოხსნა და 7 შედეგიანი გადაცემა დააგროვა. მატჩის დასრულების შემდეგ გამართულ პრესკონფერენციაზე სწორედ ეს წყვილი გამოარჩია ვილი ერნანგომესმა, რომელმაც აღნიშნა, რომ მათ უმაღლესი დონის კალათბურთი ითამაშეს.

როგორც აღვნიშნეთ, თორნიკე შენგელიამ ესპანეთთან 37 ქულა ჩააგდო, რაც მისი სანაკრებო კარიერის რეკორდია. აქამდე კაპიტნის საუკეთესო მონაგარი 31 ქულას შეადგენდა.

საქართველოს ეროვნულმა საკალათბურთო ნაკრებმა A-ჯგუფში ასპარეზობა 3 მოგებითა და 3 მარცხით, მე-3 ადგილზე დაასრულა. ამ შედეგით ჩვენი ნაკრები ესპანეთთან და უკრაინასთან ერთად მე-2 ჯგუფურ ეტაპზე გავიდა, სადაც B-ჯგუფის საუკეთესო სამეულს დაუპირისპირდება.

B-ჯგუფის საუკეთესო სამეულს საბერძნეთი, მონტენეგრო, პორტუგალია და რუმინეთი გაარკვევენ. ნაკრებებს პირველი ეტაპის შედეგები გადაჰყვებათ და მე-2 ეტაპზე მხოლოდ მათ შეხვდებიან, ვისთანაც მანამდე არ უთამაშიათ - საბოლოოდ, ჯგუფების 3-3 საუკეთესო ნაკრები მსოფლიოს ჩემპიონატზე გავა.