მსოფლიოს ჩემპიონატის შესარჩევ ეტაპზე საქართველოს ქალთა ნაკრების მეტოქეები ცნობილია

4 ნოემბერს, ნიონში, ქალთა 2027 წლის მსოფლიო ჩემპიონატის საკვალიფიკაციო ეტაპის წილისყრა გაიმართა.

საქართველოს ნაკრები შესარჩევი ეტაპის C ლიგაში იასპარეზებს. ირის ანტმანის გუნდი მე-4 ჯგუფში მოხვდა, სადაც ჩვენი გუნდის მეტოქეები საბერძნეთის და ფარერის კუნძულების ნაკრებები იქნებიან. 

C ლიგიდან საკვალიფიკაციო ეტაპის ორრაუნდიანი პლეი-ოფის საგზურს ჯგუფების გამარჯვებულები მიიღებენ, რომლებიც ასევე 2027 წლის ერთა ლიგის გათამაშებისთვის B ლიგაში დაწინაურდებიან. მსოფლიო ჩემპიონატის საკვალიფიკაციო ეტაპის პლეიოფის დამატებით ორ საგზურს ასევე მიიღებს C ლიგის ორი საუკეთესო მეორეადგილოსანი.

ჯგუფური ეტაპის მატჩები 2026 წლის 3-7 მარტს, 14-18 აპრილს და 5-9 ივნისს უნდა გაიმართოს.