დავით ლორიაშვილმა სამბოს ევროპის ჩემპიონატზე ოქროს მედალი მოიპოვა

დავით ლორიაშვილი (98 კგ) სამბოში ევროპის ჩემპიონია. სამბოს ევროპის ჩემპიონატი სერბეთის ქალაქ ნოვი სადში დღეს დაიწყო და 12 მაისს დასრულდება. პირველ საშეჯიბრო დღეს მედლები 14 წონით კატეგორიაში გათამაშდა.

ლორიაშვილს სულ 3 შეხვედრის მოგება ეყო იმისთვის, რომ ჩემპიონი გამხდარიყო. პირველ წრეში ქართველი ისრაელის წარმომადგენელს, იტაი პაშინსკის დაუპირისპირდა და მეტოქე 7:1 დაამარცხა. ნახევარფინალში დავითის მეტოქე აზერბაიჯანელი რასულ აიდამიროვი იყო, რომელსაც საკმაოდ მარტივად, ანგარიშით 5:0 გაუმკლავდა. 98 კგ წონით კატეგორიაში, ფინალი ქართველსა და სომეხ სპორტსმენებს შორის შედგა, დაძაბულ ბრძოლაში ლორიაშვილმა არსენ ხანჟიანი 1:0 დაამარცხა და ევროპის ჩემპიონის ტიტული მოიპოვა.