ფუტსალი | FLC03 საჩემპიონო ბრძოლისთვის ემზადება

3 მაისს, თბილისის ოლიმპიურ სასახლეში ფუტსალის ლიგა 2-ის ფინალური სერიის პირველი მატჩი გაიმართება, რომელშიც "ტფილისი" - "FLC03"-ს დაუპირისპირდება.

რეგულარული სეზონისა და პლეი-ოფის მატჩებში დაფიქსირებული რეზულტატიდან გამომდინარე, გულშემატკივარს უშეღავათო ბრძოლა ელის, სადაც გამარჯვებისთვის ორივე გუნდი ბოლომდე იბრძოლებს. "ტფილისი" ფუტსალის ლიგა 2-ის რეგულარული სეზონის დომინანტი პირველადგილოსანია - გუნდმა 14 მატჩიდან 10-ის მოგება შეძლო. რაც შეეხება "FLC03"-ს, "ფალკონები" პლეი-ოფში დამაჯერებლად ასპარეზობენ. "FLC03"-მა 1/4-ფინალურ სერიაში ვიცე-ჩემპიონი, "ბათუმის სახელმწიფო საზღვაო აკადემია" დაამარცხა, ხოლო 1/2-ფინალში "სეუ"-ს ბარიერი დაძლია.

ფინალურ სერიაში "ფალკონების" მთავარი შემტევი ძალა გიორგი ხმალაძე იქნება, რომელმაც მიმდინარე სეზონში ჩატარებულ 11 მატჩში, 12 გოლის გატანა და 5 საგოლე გადაცემის შესრულება შეძლო. ასევე, შედეგიანი თამაშით გამოირჩევიან დავით ბერაძე (8 გოლი, 6 ასისტი) და ბექა მირიანაშვილი (8 გოლი, 3 ასისტი).

ფინალური სერიის წინ, "FLC03"-ის დამფუძნებელი და კაპიტანი გუნდში არსებული მდგომარეობის შესახებ საუბრობს და მატჩის მნიშვნელობას უსვამს ხაზს.

შეგახსენებთ, ფუტსალის ლიგა 2-ის ფინალური სერიის პირველი მატჩი, 3 მაისს, 21:30 საათზე, თბილისის ოლიმპიურ სასახლეში გაიმართება.