ზიდანის შვილი ალჟირის ეროვნულ ნაკრებში გამოიძახეს

გრანადას მეკარე, ლუკა ზიდანი ალჟირის ეროვნულ ნაკრებში გამოიძახეს. ზიდანის შვილის დებიუტი აფრიკულ ნაკრებში, შესაძლოა, ,,სპორტული მოქალაქეობის'' შეცვლიდან სულ რაღაც 2 კვირაში შედგეს.

ლუკას საფრანგეთის 16, 17, 18, 19 და 20-წლამდელთა ნაკრებებში აქვს ნათამაშები. ფიფამ მისი მოთხოვნა ,,სპორტული მოქალაქეობის'' შეცვლის შესახებ 19 სექტემბერს დააკმაყოფილა.

ალჟირის ნაკრებს ოქტომბერში მსოფლიო ჩემპიონატის შესარჩევი ეტაპის მატჩები ელის - ვლადიმირ პეტკოვიჩის გუნდი 9-ში სომალის ესტუმრება, 14-ში კი უგანდას უმასპინძლებს. ალჟირელები საკვალიფიკაციო ეტაპის G ჯგუფში პირველ ადგილს იკავებენ და მუნდიალის საგზურის მოპოვებასთან ძალიან ახლოს არიან.

მიმდინარე სეზონში ლუკა ზიდანმა გრანადას მაისურით 6 შეხვედრა ჩაატარა და 11 გოლი გაუშვა, კარი მშრალად კი 1 მატჩში შეინახა.

• ზიდანების ოჯახი წარმოშობით ალჟირიდანაა. ზინედინ ზიდანის მშობლები კაბილიის რეგიონიდან საფრანგეთში საცხოვრებლად 1953 წელს, ალჟირის ომის დაწყებამდე გადავიდნენ.