საქართველო Vs. შოტლანდია | რა განწყობა აქვს მეტოქეს ჩვენთან შეხვედრის წინ?

16 ნოემბერს, 21:00-ზე, საქართველოს ეროვნული საფეხბურთო ნაკრები შოტლანდიას უმასპინძლებს. მატჩი ევრო 2024-ის საკვალიფიკაციო ეტაპის ეგიდით გაიმართება.

შოტლანდიის ნაკრებმა 6 მატჩში 15 ქულას მოუყარა თავი და შედეგად, მომდევნო ეტაპზე გასვლა განაღდებული აქვს. რაც შეეხება საქართველოს, დღევანდელ მატჩში გამარჯვების შემთხვევაში, ჩვენს გუნდს მესამე ადგილისთვის ბრძოლა კვლავ შეუძლია.

მატჩის წინ, ქართული მედიისთვის შოტლანდიურმა მხარემ ონლაინ პრესკონფერენცია გამართა.

მიმდინარე საკვალიფიკაციო ეტაპზე, საქართველოს ნაკრები შოტლანდიას 20 ივნისს ეწვია და წვიმიან მატჩში, რომლის შეწყვეტა და დროებით გადადებაც განიხილებოდა, ანგარიშით 2:0 დამარცხდა.

აღსანიშნავია, რომ ჩვენს მეტოქეს თბილისში გამართული შეხვედრები კარგად არ ახსენდება და შოტლანდიელები ამ ტრადიციის დარღვევისთვის ემზადებიან: ორ მატჩში, საქართველოს შოტლანდია 2-ჯერ ჰყავს დამარცხებული (2:0, 1:0).