საფრანგეთი Vs ერაყი - ყველაზე ხანგრძლივი მატჩი მსოფლიო ჩემპიონატების ისტორიაში

საფრანგეთის ნაკრებმა ერაყი მსოფლიო ჩემპიონატების ისტორიაში ყველაზე ხანგრძლივ მატჩში დაამარცხა.

ძლიერმა ჭექა-ქუხილმა ორგანიზატორები აიძულა შეხვედრა შეეწყვიტათ. ამ იძულებითი შესვენების გამო, თამაშის ხანგრძლივობა თითქმის 4 საათამდე გაიწელა, რის შედეგადაც ის მსოფლიო ჩემპიონატის ყველაზე ხანგრძლივ მატჩად იქცა.

შეხვედრა სულ 131 წუთით შეფერხდა. თამაში ადგილობრივი დროით 17:49 საათზე შეწყდა და საღამოს 20:00 საათამდე არ განახლებულა. შტორმს თან ახლდა ძლიერი წვიმა, ქარი და მეხის დაცემის საფრთხე, რის გამოც გულშემატკივრები და ფეხბურთელები იძულებულნი გახდნენ, თავშესაფრისთვის შეეფარებინათ თავი.

ადგილობრივი ხელისუფლების მიერ დადგენილი პროტოკოლები მკაცრია. წესების თანახმად, თამაში უნდა შეწყდეს, თუ სტადიონიდან 13 კილომეტრის რადიუსში ჭექა-ქუხილი ან მეხის დაცემა დაფიქსირდება. შეხვედრის გასაგრძელებლად საჭიროა, რომ 13-კილომეტრიან ზონაში მეხის გარეშე 30-წუთიანმა ფაზამ ჩაიაროს. ყოველი ახალი დაცემის შემდეგ 30-წუთიანი ათვლა ხელახლა იწყება.

საფრანგეთისა და ერაყის მატჩი მსოფლიო ჩემპიონატზე პირველია, რომელიც უამინდობის გამო გადაიდო. თუმცა, მსგავსი შეფერხებები მოსალოდნელიც იყო, რადგან ანალოგიური შემთხვევები გასულ ზაფხულს, მსოფლიო საკლუბო ჩემპიონატის დროსაც მოხდა.