პსჟ-ს პატარა გასახდელი შეხვდა და პრობლემის გადაჭრაში UEFA ჩაერია

უეფას სუპერთასის ფინალის წინ, პსჟ უკმაყოფილო დარჩა ზალცბურგის მოედანზე (რედ ბულ არენა) მიღებული პირობებით.

საქმე ისაა, რომ პარიზელებმა უეფას აცნობეს, რომ „რედ ბულ არენაზე“ შექმნილი პირობებით უკმაყოფილონი იყვნენ. დავა უშუალოდ ორგანიზაციულ საკითხებსა და გამოყოფილი გასახდელის ზომას ეხებოდა. ასტონ ვილას ის სივრცე ერგო, რომელსაც ჩვეულებრივ მასპინძელი გუნდი (ზალცბურგი) იყენებს, ხოლო პსჟ-ს, თავდაპირველად, სტუმარი გუნდის შედარებით პატარა გასახდელით დაკმაყოფილება შესთავაზეს.

ეს გადაწყვეტილება პარიზული კლუბის ხელმძღვანელობამ მიუღებლად მიიჩნია, რადგან მსგავსი მასშტაბის მატჩებში ლოჯისტიკურ დეტალებს უდიდეს ყურადღებას აქცევს. ორშაბათს გამართულ ოფიციალურ შეხვედრაზე, ფრანგულმა მხარემ, უეფას წარმომადგენლებს, პროტესტი პირდაპირ გამოუცხადა და აღნიშნა, რომ მათი გუნდისთვის გამოყოფილი სივრცე მეტისმეტად ვიწრო იყო. პარიზში მიიჩნევენ, რომ თანაბარი ინფრასტრუქტურით სარგებლობა მათი ლეგიტიმური უფლებაა.

დავა გასახდელის გარშემო

პარიზელთა უკმაყოფილება კულისებში თქმული უბრალო შენიშვნით არ დასრულებულა. BBC-ის ინფორმაციით, პსჟ-მ კატეგორიულად მოითხოვა ზუსტად იმავე ფართობის სივრცე, როგორიც ასტონ ვილას ჰქონდა. ამ დაძაბულობამ უეფა აიძულა, მატჩის წინ სასწრაფო კომპრომისი ეპოვა. ევროპული ფეხბურთის მმართველმა ორგანომ მიიღო გადაწყვეტილება, პსჟ-სთვის დამატებითი გასახდელი გამოეყო (რომელსაც ჩვეულებრივ ოფიციალური პირები იყენებენ), რათა ლუის ენრიკეს ფეხბურთელებსა და შტაბს სრული კომფორტი ჰქონოდათ. ამ ნაბიჯით ფრანგულმა კლუბმა პირობები მაქსიმალურად გაითანაბრა.