მესი მთავარ არბიტრს: "უპატივცემულოდ ნუ მეპყრობი"

მსოფლიო ჩემპიონატის 1/4-ფინალში, არგენტინამ შვეიცარია დაამარცხა და ნახევარფინალში გავიდა. მატჩი, რამდენიმე მიზეზის გამო, საკმაოდ დრამატული გამოდგა. შეხვედრის დამთავრების შემდეგ, განხილვის ერთ-ერთი ძირითადი საგანი, ლეო მესისა და შეხვედრის მთავარი არბიტრის, ჟოაო პედრო პინეიროს სიტყვიერი დაპირისპირება აღმოჩნდა.

ერთ ეპიზოდში, შვეიცარიელთა სასარგებლოდ ჯარიმა დაინიშნა. ამ მომენტში კი, მესი, რომელიც ცოცხალ კედელში დადგა, მიიჩნევდა, რომ პინეირო, არგენტინელი ფეხბურთელების პოზიციური განლაგებისას, ზედმეტად მკაცრად მოქმედებდა, რამაც მისი უკმაყოფილება გამოიწვია.

ტელეტრანსლაციის კადრების მიხედვით, ამ ეპიზოდში, ლეომ, მსაჯს საკმაოდ მკაცრად მიმართა.

"სწორად დამელაპარაკე. ნუ მეპყრობი უპატივცემულოდ" - იყო მესის სიტყვები.

გარდა ამ მომენტისა, ეს მატჩი, ბრილ ემბოლოს ეპიზოდითაც გამოირჩა, როდესაც ის ლეანდრო პარედესის წინააღმდეგ, სიმულაციის გამო, მოედნიდან გააძევეს.

არგენტინამ ალექსის მაკალისტერის, ხულიან ალვარესისა და ლაუტარო მარტინესის გოლებით, შვეიცარია 3:1 დაამარცხა. შვეიცარიელთაგან, ერთადერთი გოლი დან ნდოიემ გაიტანა.

მართალია დღევანდელ შეხვედრაში მესიმ გოლი ვერ გაიტანა, მაგრამ, ამის მიუხედავად, მაინც დაამყარა კიდევ ერთი რეკორდი. პირველი გოლი დროს, მესის კუთხურიდან მოწოდების შემდეგ, ალექსის მაკალისტერმა გაიტანა. ეს მესისთვის, მუნდიალების ისტორიაში, მე-10 ასისტი იყო, რაც ყველა დროის საუკეთესო შედეგია. ამრიგად, მესი მსოფლიო ჩემპიონატს ორ კომპონენტში, გოლებსა (21) და საგოლე გადაცემებში (10) ლიდერობს.

არგენტინა, ამ გამარჯვებით ნახევარფინალში გავიდა, სადაც მისი მეტოქე ინგლისი იქნება.