კიდევ ერთი ამბავი პირადი ტრაგედიისა და პსჟ-ს ტრიუმფის შესახებ

მიუნხენში, ჩემპიონთა ლიგის ფინალში, ინტერთან ისტორიული გამარჯვება არა მხოლოდ საფეხბურთო დომინირების დემონსტრირება იყო, არამედ პსჟ-ს ესპანური სამწვრთნელო შტაბისთვის ღრმად ემოციური მომენტიც. ყველაზე ემოციურ სცენებს შორის იყო ლუის ენრიკეს ასისტენტის, რაფელ პოლის ცრემლები - კამერების მიუხედავად, მას თავის შეკავება არ შეეძლო.

ეს ცრემლები სიმბოლურად არა მხოლოდ ევროპის წამყვანი საფეხბურთო ტურნირის პირველად მოგების სიხარულს წარმოადგენდა, მათ ღრმა პირადი მნიშვნელობაც ჰქონდათ პოლისთვის, რომლის მეუღლეც, რაკელი, ამ სეზონის დასაწყისში, ხანგრძლივი ავადმყოფობის შემდეგ გარდაიცვალა.

2024 წლის ნოემბერში, ჩემპიონთა ლიგაზე მოპოვებული გამარჯვების შემდეგ, ლუის ენრიკემ პრესკონფერენცია ამ სიტყვებით დაიწყო: "დღეს ძალიან სამწუხარო დღეა. გუნდის მნიშვნელოვანმა წევრმა დაკარგა ცოლი. რაფელ პოლის ცოლი ხანგრძლივი ავადმყოფობის შემდეგ გარდაიცვალა. გვინდა, ეს გამარჯვება რაკელს და რაფელს მივუძღვნათ და, რა თქმა უნდა, მათ ოჯახებს. ვიზიარებთ მათ ტკივილს და დიდ მხარდაჭერას ვუცხადებთ".

თავად ლუის ენრიკეც, გამარჯვების შემდეგ, მთავარ პირად იქცა, როცა ტრიბუნაზე გულშემატკივრებმა გულისამაჩუყებელი ბანერი გაშალეს, რომელზეც მწვრთნელი მის ქალიშვილ ქსანასთან ერთად იყო გამოსახული. ქსანა 2019 წელს, ცხრა წლის ასაკში, ძვლის სიმსივნით გარდაიცვალა. ტიფო იმეორებდა ულამაზეს ფოტოს, რომელიც გადაღებულია ათი წლის წინ, როდესაც ლუის ენრიკემ ჩემპიონთა ლიგა ბარსელონასთან ერთად მოიგო.