"გთხოვთ, არ დაგვივიწყოთ" | შევჩენკომ უკრაინის ომზე ისაუბრა

1 თვის წინ, შევჩენკომ პოლონეთში უკრაინელი ბავშვები მოინახულა, რომლებსაც ქვეყნის დატოვება მოუწიათ - ბავშვები, რომელთა მომავალიც, ამ ეტაპზე, ბუნდოვანია. იქ ყოფნისას, "მილანისა" და "ჩელსის" ყოფილმა ფეხბურთელმა რობერტ ლევანდოვსკისა და იგა შვიონტეკის შესახებ ისაუბრა. უკრაინელის თქმით, პოლონელი სპორტსმენები უკრაინის დასახმარებლად ბევრ რამეს აკეთებენ. მაგალითისთვის, შვიონტეკმა, რომელიც ქალთა ჩოგბურთის ასოციაციის (WTA) მიხედვით მსოფლიოში 1-ელი ჩოგანია, საქველმოქმედო მატჩი მოაწყო და შემოსული თანხა მთლიანად ლტოლვილთა დასახმარებლად გადარიცხა.

"მათი დახმარება ძალიან მნიშვნელოვანია - სპორტსმენები ახალგაზრდა თაობისთვის მისაბაძ მაგალითს წარმოადგენენ. როდესაც ისინი ომის საწინააღმდეგო გზავნილს აკეთებენ, მათი სიტყვა მთელ მსოფლიოში ვრცელდება", - თქვა შევჩენკომ.

ომის დაწყებიდან პირველ დღეებში, მსოფლიო მედიის ყურადღება მხოლოდ უკრაინას ეთმობოდა, თუმცა დროთა განმავლობაში, ტენდენციამ ცვლილება განიცადა. შევჩენკო მიიჩნევს, რომ ეს ნორმალური პროცესია, თუმცა მნიშვნელოვანია, რომ ადამიანებმა კვლავ იცოდნენ, თუ რამდენად დიდი საშიშროების წინაშე დგანან უკრაინელები, რომლებიც დაბომბვის რისკის ქვეშ ყოველდღიურად იმყოფებიან.

---

"არ უნდა მიგვავიწყდეს, თუ რა ხდება დღეს უკრაინაში. რუსები დაბომბვას აგრძელებენ, ომი არ დასრულებულა. უკრაინელ ხალხს მსოფლიოს უდიდესი მხარდაჭერა სჭირდება. გთხოვთ, არ დაივიწყოთ ჩვენს შესახებ, ჩვენ თქვენი დახმარება გვჭირდება".

---

---

ივნისში, უკრაინის საფეხბურთო ნაკრებმა შოტლანდია ანგარიშით 3:1 დაამარცხა. ეს იყო პირველი ოფიციალური მატჩი რუსული აგრესიის დაწყების დღიდან. შოტლანდიასთან ემოციურ გამარჯვებას უელსთან მარცხი მოჰყვა - უკრაინელები ყატარის მსოფლიო ჩემპიონატზე ვერ მოხვდნენ, თუმცა შევჩენკოს თქმით, ფეხბურთმა ომით დაზარალებულ ქვეყანას იმედი ჩაუსახა.

"სპორტს აქვს საოცარი ძალა: მას ადამიანების გაერთიანება შეუძლია. შოტლანდიელ გულშემატკივარს შორის, უკრაინელების მხარდაჭერა იგრძნობოდა. ისეთი გრძნობა მქონდა, რომ ხალხს უკრაინისთვის კარგი სურდა. ფეხბურთელებმა მოედანზე თავისი მაქსიმუმი გვაჩვენეს, თუმცა სპორტში მხოლოდ 1 გამარჯვებული არსებობს. სამწუხაროდ, ბოლო ეტაპის გადალახვა ვერ შევძელით" - იხსენებს შევჩენკო.

მიმდინარე თვის ბოლოს, უკრაინელები ეროვნული ჩემპიონატის აღდგენას გეგმავენ. სპორტის მინისტრის, ვადიმ გუცაიტის განცხადებით, შეხვედრები მაყურებლის გარეშე გაიმართება, სტადიონების უსაფრთხოება კი მაქსიმალურად იქნება დაცული.