ეგოიანმა ექსელსიორს მოაგებინა და მატჩის საუკეთესო გახდა

ნიდერლანდების ჩემპიონატის მე-17 ტურში ექსელსიორმა ზვოლეს უმასპინძლა და 2:1 დაამარცხა. ირაკლი ეგოიანმა მატჩის გადამწყვეტი გოლი გაიტანა, ექსელსიორს მოაგებინა და საუკეთესო მოთამაშედაც დასახელდა. საქართველოს ახალგაზრდული ნაკრების ფეხბურთელმა შეხვედრა სრულად ჩაატარა.

ანგარიში მასპინძლებმა მე-20 წუთზე გახსნეს, ზვოლემ მეორე ტაიმის დაწყებიდან 3 წუთში გაათანაბრა, ეგოინმა კი თამაშის მომგები გოლი 78-ე წუთზე გაიტანა. ირაკლისთვის ეს მიმდინარე სეზონში მეორე გოლი იყო, მას ერედივიზიაში ორი საგოლე გადაცემაც აქვს გაკეთებული.

ეგოიანმა, ორივე გუნდის შემადგენლობაში, უმაღლესი შეფასება დაიმსახურა - SOFASCORE-მა მისი თამაში 8.1 ქულით შეაფასა, WHOSCORED-მა კი ქართველს 8 ქულა დაუწერა.

ექსელსიორი და ზვოლე ცხრილში მეზობლები არიან, ორივე გუნდს 19 ქულა აქვს და მე-11/მე-12 პოზიციებს ინაწილებენ.