დე იონგი ავტოგრაფიანი მაისურების გადამყიდველების წინააღმდეგ

ავტოგრაფიანი მაისურების გადაყიდვის ბიზნესთან საბრძოლველად, ფრენკი დე იონგმა, ეფექტურ ხერხს მიმართა: ავტოგრაფის დატოვებამდე ის გულშემატკივრებს სახელს ეკითხება. ეს მარტივი ხერხი მას საშუალებას აძლევს, მაისურები პერსონალიზებული გახადოს და გადამყიდველებს მათი სარეალიზაციოდ განთავსება საგრძნობლად გაურთულოს.

ხელმოწერილი სათამაშო მაისურების გადაყიდვა, თანამედროვე საფეხბურთო სამყაროში, გავრცელებულ პრაქტიკად იქცა. ესპანეთში ათობით ქომაგი რეგულარულად მორიგეობს სავარჯიშო ბაზებთან, რათა ფეხბურთელებისგან ავტოგრაფი მოიპოვოს. სასურველი ხელმოწერის მიღებისთანავე, ზოგიერთი მათგანი მაისურს დაუყოვნებლივ დებს გასაყიდად სპეციალიზებულ პლატფორმებზე, სადაც ავტოგრაფის ავთენტურობაზე აკეთებს აქცენტს - ეს პროცედურა მათ საშუალებას აძლევს, ფორმა საწყის ღირებულებაზე ბევრად ძვირად გაყიდონ.

მსგავსი სპეკულაცია მოთამაშეთა დიდ ნაწილში უკმაყოფილებას იწვევს, რისი ნათელი მაგალითიც ფრენკი დე იონგია. ბარსელონას 29 წლის ნიდერლანდელმა ნახევარმცველმა, რომელიც ამჟამად მუხლის ტრავმის შემდეგ რეაბილიტაციის კურსს გადის, გადამყიდველების წინააღმდეგ საკუთარი მეთოდი შეიმუშავა. სოციალურ ქსელებში გავრცელებულ ვიდეოში ჩანს, როგორ სთხოვს ფეხბურთელი თითოეულ ფანს სახელს, რათა მაისური კონკრეტული ადამიანის სახელზე გააფორმოს. იმ შემთხვევაში, თუ რომელიმე მათგანი სახელს არ ეუბნება, დე იონგი მას ავტოგრაფის მიცემაზე ცივ უარს ეუბნება.