ბურგოსის ღირსეული ქმედება | მატჩიდან შემოსული თანხა გარდაცვლილი ფეხბურთელის ოჯახს გადაერიცხება

ესპანეთის ლა ლიგა 2-ში მყოფმა გუნდმა ბურგოსმა, ძალიან ემოციური და საქველმოქმედო ინიციატივა წამოიწყო. კლუბმა ოფიციალურად განაცხადა, რომ ტენერიფესთან გასამართი მატჩიდან შემოსული მთელი თანხა ტრაგიკულად გარდაცვლილი ფეხბურთელის, ხესუს დე მიგელის ოჯახს, კერძოდ კი მის მცირეწლოვან ქალიშვილს გადაეცემა. ეს მნიშვნელოვანი შეხვედრა ლა ლიგა 2-ის 31-ე ტურის ფარგლებში, სტადიონ „ელ პლანტიოზე“ 2027 წლის 20-21 მარტის უქმეებზე გაიმართება.

კლუბის ოფიციალურ განცხადებაში აღნიშნულია, რომ ფეხბურთელის დაკარგვამ საზოგადოება და გულშემატკივრები უდიდესი მწუხარებით მოიცვა. როგორც ბურგოსი აღნიშნავს, მოთამაშის მიღმა დგას ოჯახი, რომელიც წარმოუდგენელ ტკივილს განიცდის და ეს ჟესტი სწორედ მათი მხარდაჭერისა და სიყვარულის დასტურია. კლუბში კარგად აცნობიერებენ, რომ არცერთ ფინანსურ დახმარებას არ ძალუძს მამის დაკარგვით გაჩენილი სიცარიელის შევსება, თუმცა ფეხბურთს აქვს ძალა, ათასობით ადამიანი გააერთიანოს და დაეხმაროს მათ, ვისაც ეს ყველაზე მეტად სჭირდება.

ბურგოსი მოუწოდებს გულშემატკივრებს, რომ მატჩის დღეს „ელ პლანტიო“ იქცეს ერთ დიდ, გამამხნევებელ ჩახუტებად მთელი საფეხბურთო ოჯახისგან. კლუბს სურს, რომ თითოეულმა გაყიდულმა ბილეთმა რეალური წვლილი შეიტანოს ფეხბურთელის ქალიშვილის მომავლის უზრუნველყოფაში და მის ოჯახს გაუგზავნოს მესიჯი: „ჩვენ თქვენს გვერდით ვართ“. კლუბმა კიდევ ერთხელ მიუძღვნა სამძიმარი ფეხბურთელის ოჯახს, ახლობლებს, თანაგუნდელებსა და ტენერიფეს გულშემატკივრებს.

ეს ძალიან კარგი ინიციატივა კიდევ ერთხელ ადასტურებს, რომ ფეხბურთი მხოლოდ სპორტი არ არის - ის არის ერთიანობის, სოლიდარობისა და ადამიანური თანაგრძნობის უძლეველი ძალა, რომელიც ყველაზე რთულ მომენტებში გვერდში უდგას მათ, ვისაც ეს ყველაზე მეტად სჭირდება.