საქართველოს ტყვიის მსროლელთა ნაკრები შერეულ წყვილებში ევროპის ჩემპიონი გახდა

უნგრეთის ქალაქ დიორში მიმდინარე ტყვიის მსროლელთა ახალგაზრდულ ევროპის ჩემპიონატზე მარიამ ფროდიაშვილმა და გიორგი მუმლაძემ შერეულ წყვილებში 10 მეტრზე პნევმატიკური იარაღიდან სროლაში ოქროს მედალი მოიპოვეს.

ქართველმა მსროლელებმა ფინალში გერმანული წყვილი - ცელინა ბეკერი და ედუარდ ბაუმაისტერი 17:15 დაამარცხეს.

შეჯიბრებაში საქართველოს მეორე წყვილიც (მარიამ აბრამიშვილი და იოანე ხვარეშია) გამოდიოდა, თუმცა პლეი-ოფის ოთხეულში ვერ მოხვდა და 561 ქულით მე-7 ადგილზე გავიდა.

აღსანიშნავია, რომ შარშან ამავე რანგის ასპარეზობაზე შერეულ წყვილებში გათამაშებული ორი ბრინჯაოს მედლიდან, ორივე ქართულმა წყვილმა დაისაკუთრა.

წყარო: საქართველოს ეროვნული ოლიმპიური კომიტეტი