ნიკოლოზ ბასილაშვილი როლან გაროსს გამოეთიშა

საფრანგეთის ღია პირველობის 1/64-ფინალში მსოფლიოს 133-ე ჩოგანი, ნიკოლოზ ბასილაშვილი, პორტუგალიელ მეტოქესთან, ენრიკე როშასთან (200) 5 სეტში, ანგარიშით 6:7, 6:2, 6:7, 6:2, 2:6 დამარცხდა და ტურნირს გამოეთიშა.

შეხვედრა 3 საათსა და 56 წუთს გაგრძელდა. ნიკოლოზმა მატჩში 5 ეისი შეასრულა, მისმა მოწინააღმდეგემ კი - 13, ქართველმა ჩოგბურთელმა 10 ორმაგი შეცდომა დაუშვა, პორტუგალიელმა კი - 5.

ეს ბასილაშვილისთვის წელს მეორე გრანდ სლემი იყო - ნიკამ იანვარში ავსტრალიის ღია პირველობაზეც იასპარეზა, სადაც ასევე პირველ რაუნდში დამარცხდა.

როლან გაროსის მოქმედი ჩემპიონი კარლოს ალკარასია - ესპანელმა შარშან ფინალში ალექსანდრ ზვერევს მოუგო.