ჭიდაობის საერთაშორისო ფედერაციამ დღევანდელი სხდომის შემდეგ უკრაინელ ხალხს მხარდაჭერა გამოუცხადა.
UWW-ის გადაწყვეტილებით, რუს და ბელარუს მოჭიდავეებსა და ოფიციალურ პირებს საერთაშორისო შეჯიბრებებში მონაწილეობა აეკრძალათ. გარდა ამისა, საერთაშორისო ფედერაციამ რუსეთსა და ბელარუსში გასამართი ტურნირებიც გააუქმა.
ტოკიოს ოლიმპიადაზე რუსმა სპორტსმენებმა ბერძნულ-რომაულ და თავისუფალი სტილით ჭიდაობაში სულ 8 მედალი (4 ოქრო, 4 ბრინჯაო) მოიპოვეს და მედლების საერთო რაოდენობით მხოლოდ აშშ-ს ჩამორჩნენ.
21 თებერვალს ვლადიმერ პუტინმა დონბასისა და ლუგანსკის დამოუკიდებლობა აღიარა, 24 თებერვალს კი რუსეთი უკრაინაში შეიჭრა და ომი დაიწყო.
სპორტის არაერთი სახეობის საერთაშორისო ფედერაციამ რუსეთი მკაცრი სანქციებით დასაჯა.
