ქროსფიტი | ნიკო მაისურაძე ევროპის საუკეთესო ათლეტებთან ერთად, სპეციალურ კემპს გაივლის

25 წლის ქართველი სპორტსმენი - ნიკო მაისურაძე, ევროპის საუკეთესო ქროსფიტ ათლეტებს შორის მოხვდა და მსოფლიო ჩემპიონატის შესარჩევი ტურისთვის მოსამზადებლად, ესპანეთის კუნძულ მალიორკაზე გაემგზავრება.

12-17 ივლისს, ნიკო მაისურაძე გაძლიერებულ კემპს გაივლის, რომლის ფარგლებშიც მსოფლიო ჩემპიონატის პრიზიორები მასტერკლასებს ჩაატარებენ. სპეციალურ მომზადების პროგრამას სპორტის სხვადასხვა სახეობის მაღალკვალიფიური წარმომადგენლები გაუძღვებიან.

კემპზე გამგზავრების წინ, ნიკო მოტივირებულია და აღნიშნავს, თითოეული ასეთი შეკრება წინ გადადგმული ნაბიჯია, რომელიც დასახული მიზნის მიღწევაში დაეხმარება.

ქროსფიტი ეს არის ფუნქციონალური ვარჯიშის მეთოდოლოგია, რომელიც ყოველდღიურ ცხოვრებაში შეიძლება, რომ ნებისმიერს გამოადგეს. მისი მთავარი მიზანია, რომ ადამიანი  მზად იყოს ნებისმიერი ფიზიკური და მენტალური გამოწვევისთვის, რომელსაც ყოველდღიური ცხოვრება გვიმზადებს.

შეგახსენებთ, რომ გასულ წელს, ნიკო მაისურაძემ ქროსფიტის მსოფლიო ჩემპიონატის შესარჩევ ტურზე იასპარეზა, რომელიც საფრანგეთში გაიმართა. მსოფლიო ჩემპიონატის შესარჩევ ტურზე ევროპის საუკეთესო 40 ათლეტი იყო წარმოდგენილი.