პორტუგალიელი ხელბურთელი ნორვეგიელებს ტაიმაუტისას უსმენდა

ხელბურთის ევროპის ჩემპიონატზე უცნაური ფაქტი დაფიქსირდა. ფინალური ეტაპის ჯგუფში ჩატარებულ შეხვედრაში, სადაც პორტუგალია ნორვეგიას ხვდებოდა, პორტუგალიელი ხელბურთელი 'ჯაშუშობაში' გამოიჭირეს.

დაძაბული მატჩის დასრულებამდე 17 წამით ადრე ანგარიში 35:35 იყო. ნორვეგიას ბოლო შეტევა ჰქონდა, ამიტომ მათმა მწვრთნელმა, იონას ვილემ ტაიმაუტი აიღო, რათა გამარჯვების კომბინაცია შეემუშავებინა და ჩემპიონატის ნახევარფინალში გასვლის იმედი შეენარჩუნებინა - მომენტი, რომელიც მკაცრად კონფიდენციალური უნდა ყოფილიყო. ნორვეგიულმა პერსონალმა სწრაფად გააცნობიერა, რომ ფრთხილად უნდა ყოფილიყვნენ...

სკანდინავიურმა პრესამ გამოავლინა, რომ პორტუგალიელი ხელბურთელი, მიგელ ნევეში, იდეალურად ფლობდა ენას - ის ნორვეგიულ კლუბშიც თამაშობდა და პარტნიორიც ნორვეგიელი ჰყავს. მას შეეძლო მოწინააღმდეგე გუნდის ინსტრუქციების გაგება და ეს გააკეთა კიდეც - დაინახეს, თუ რაგორ უსმენდა აიპადში მოწინააღმდეგე გუნდის ტაიმაუტს. როგორც ცნობილია, ნორვეგიელებმა ამ დროს, კოდური სიტყვების გამოყენება დაიწყეს.

საბოლოოდ, შეხვედრა ფრედ (35:35) დასრულდა და ორივე გუნდმა დაკარგა ნახევარფინალში თამაშის შანსი.

"ისინი გვისმენენ, ბიჭებო" - ისმის ნორვეგიელების ხმა ტაიმაუტიდან.