მსოფლიო ჩემპიონატამდე ბორჯღალოსნები სამ ტესტ მატჩს გამართავენ

2023 წლის მსოფლიო თასის დაწყებამდე, საქართველო სამ გასახურებელ ტესტ-მატჩს გამართავს – ორს თბილისში და ერთსაც ედინბურგში.

შოტლანდიაში და მერე საფრანგეთში, მიჯრით მეექვსე მსოფლიო თასზე გამგზავრებამდე ქართველ ქომაგს ბორჯღალოსნების გაცილების ორი შანსი ექნება: მზადების დასკვნით ეტაპზე ჩვენი გუნდი პირველ შეხვედრას 12 აგვისტოს, ასევე მსოფლიო თასის მონაწილე რუმინეთთან გამართავს; 19 აგვისტოს აშშ გვეწვევა, ვისთანაც ბოლო 6 წელია არ გვითამაშია; 26 აგვისტოს კი ტიერ1-ის გუნდ შოტლანდიასთან, ედინბურგში, დასკვნით რეპეტიციას გავივლით.

საფრანგეთის მსოფლიო თასზე ბორჯღალოსნები პირველ მატჩს 9 სექტემბერს, პარიზში ავსტრალიის წინააღმდეგ გამართავს, რის შემდეგაც ორი კვირა დაისვენებს და 23-ში პორტუგალიას ტულუზში ერკინება. 30 სექტემბერს ბორდოში მისი მეტოქე ფიჯი იქნება, ჯგუფურ ეტაპს კი 7 ოქტომბერს უელსთან, ნანტში დაასრულებს.

გასახურებელ მატჩებში რუმინეთი ჩვენთვის ყველაზე კარგად ნაცნობი მეტოქეა. საქართველოს მასთან 25 წლის განმავლობაში 27-ჯერ უთამაშია (17 მოგება, 1 ფრე), აქედან ერთხელ 2011 წლის მსოფლიო თასზე ახალ ზელანდიაში.

აშშ-ს 2009-2017 წლებში 6-ჯერ შევხვდით და თანაბარი ბალანსი გვაქვს – 3-3 მოგება. მეტოქემ წარმატებას 2009 (დენვერში 31:13), 2012 (გლენდეილში 36:20) და 2013 (რუსთავში 25:23) მიაღწია, საქართველომ კი გამარჯვებები 2010 (თბილისში 19:17) და 2017 წლებში (ატლანტაში 21:17 და თბილისში 21:20) მოიპოვა.

ხუთჯერ ვეთამაშეთ შოტლანდიას და ჯერჯერობით „ნარშავები“ სრულ უპირატესობას ფლობენ.

წყარო: rugby.ge