მსოფლიო ჩემპიონატი 2026 | დღე I - ტატამზე გიორგი სარდალაშვილს ვიხილავთ

2026 წლის ძიუდოს მსოფლიო ჩემპიონატი ვაჟთა შორის 39-ე, ხოლო ქალთა შორის 30-ე გათამაშება იქნება. ტურნირი გაიმართება აზერბაიჯანში, ბაქოს ტანვარჯიშის ეროვნულ არენაზე, 2026 წლის 4-დან 11 ოქტომბრის ჩათვლით.

ძიუდოს მოყვარულთათვის ყველაზე საინტერესო და ნანატრი დღეები იწყება - ხვალიდან სტარტს მსოფლიო ჩემპიონატი აიღებს! ტატამიზე პირველი საშეჯიბრო დღის ორთაბრძოლები 11:30 საათიდან გაჩაღდება, საქართველოს ნაკრების იმედი კი 2024 წლის მსოფლიო ჩემპიონი, გიორგი სარდალაშვილი იქნება, რომელიც 60 კილოგრამ წონით კატეგორიაში ოქროს მედალის დაბრუნებას შეეცდება, ამისათვის კი გიორგის ურთულესი ბადის გავლა მოუწევს.

წილისყრამ ქართველ ფალავანს უმძიმესი ბადე არგუნა. სარდალაშვილს უმაღლესი სინჯის მედლისკენ სვლა პირველივე ეტაპიდან ურთულეს ბრძოლაში მოუწევს, სადაც მისი მეტოქე ისრაელის წარმომადგენელი იშაკ აშპიზი იქნება. აშპიზი ამჟამად მსოფლიო რეიტინგის მეორე ნომერია, შესანიშნავ საასპარეზო ფორმაში იმყოფება და ტურნირის ერთ-ერთ ფავორიტად მიიჩნევა.

ამ სერიოზულ წინააღმდეგობასთან ერთად, სარდალაშვილის ბადის მხარეს მოხვდა მოქმედი მსოფლიო ჩემპიონი, იაპონელთა უძლიერესი ძიუდოისტი - რიუჯუ ნაგაიამა. ასეთი მაღალი დონის კონკურენციის მიუხედავად, ქართველ გულშემატკივარს კარგად ახსოვს გიორგის ხასიათი და ბრძოლისუნარიანობა. სარდალაშვილს ყველაზე რთულ მომენტებშიც უჩვენებია, რომ მსოფლიოს საუკეთესო ძიუდოისტების დამარცხება და ოქროს მედლის მოპოვება შეუძლია.

ტაქტიკური ანალიზი: სარდალაშვილის სავარაუდო გზა ფინალამდე

ბადის სირთულიდან გამომდინარე, გიორგის ტურნირზე შეცდომის უფლება პრაქტიკულად არ აქვს - სტარტზევე მსოფლიოს მეორე ნომერ იცჰაკ აშპიზთან შეხვედრა მისგან მაქსიმალურ კონცენტრაციას და პირველივე წამებიდან მაღალ ტემპს მოითხოვს. აშპიზის ბარიერის დაძლევის შემთხვევაში, სარდალაშვილი დიდ თავდაჯერებულობას მოიპოვებს და შემდეგ მეოთხედფინალურ და ნახევარფინალურ ეტაპებზე მთავარი ინტრიგა სწორედ იაპონელ რიუჯუ ნაგაიამასთან სავარაუდო დაპირისპირება იქნება.

ნაგაიამასთან შეხვედრა ნამდვილი ტაქტიკური ჭიდილი იქნება, სადაც გადამწყვეტ როლს ჩავლებაზე ბრძოლა და დროული კონტრშეტევები ითამაშებს. თუ გიორგი საკუთარ სტილში, ფეთქებად, აგრესიულ და უშეღავათო ძიუდოს შეთავაზებს მეტოქეებს, მას აქვს ყველა რესურსი, რომ ეს უმძიმესი ბადე გაიაროს და ფინალურ ბლოკამდე მივიდეს.

წინასწარი დაპირისპირებები თბილისის დროით 11:30 საათზე აიღებს სტარტს, ფინალური ბლოკი კი 18:00 საათზე დაიწყება.