21-23 თებერვალს გერმანიის ქალაქ დიუსელდორფში, ძიუდოს ტურნირი, დიუსელდორფის გრან სლემი გაიმართება. რამდენიმე წუთის წინ კი გაირკვა ბადეები და ქართველი ფალავნების მეტოქეები.
I საშეჯიბრო დღე
21 თებერვალს დიუსელდორფის გრან სლემი იწყება. პირველივე დღეს კი საქართველოს სახელით 4 სპორტსმენი იასპარეზებს: -60 კგ წონითი კატეგორია (ჯაბა პაპინაშვილი; თემურ ნოზაძე); -66 კგ წონითი კატეგორია (ვაჟა მარგველაშვილი, ბაგრატ ნინიაშვილი)
-60 კგ წონით კატეგორიაში არცერთი ქართველი არ არის განთესილი, რაც იმას ნიშნავს, რომ ისინი ასპარეზობაში პირველივე ეტაპიდან ჩაერთვებიან. ჯაბა პაპინაშვილის მეტოქე ავსტრალიელი - ჯოშუა კატსი იქნება, ხოლო თემურ ნოზაძე კი გერმანელ - მორიტს პლაფკისთან შეეცდება შემდეგი ეტაპის საგზურის მოპოვებას.
რაც შეეხება -66 კგ წონით კატეგორიას, აქ ორივე ქართველი განთესილია და ისინი საქმეში მეორე ეტაპიდან ჩაერთვებიან. ვაჟა მარგველაშვილი საკუთარ ბედს ალჟირელ - ვეილ ეზინთან გაარკვევს, ხოლო ბაგრატ ნინიაშვილი კი ისრაელი წარმომადგენელ - ტალ ფლიკერს დაუხვდება.
II საშეჯიბრო დღე
მეორე საშეჯიბრო დღე სტარტს 22 თებერვალს აიღებს, სადაც საქართველოს ნაკრების ღირსებას: ფრიდონ გიგანი,ლაშა შავდათუაშვილი (-73 კგ);ნუგზარ ტატალაშვილი და ტატო გრიგალაშვილი (-81 კგ) დაიცავენ.
ფრიდონ გიგანი განთესილი არ არის და იგი პირველ რაუნდში ფარეს ბადავის დაუპირისპირდება, ხოლო 2012 წლის ოლიმპიური ჩემპიონი - ლაშა შავდათუაშვილი განთესილია და ასპარეზობაში მეორე ეტაპიდან ერთვება, სადაც მისი მეტოქე ბოცვანელი - ტირელო ლეკოკოა.
რაც შეეხება -81 კგ-ს, ნუგზარ ტატალაშვილი განთესილია და მეორე ეტაპზე რუს - ასლან ლაპინაგოვს დაუპირისპირდება, ხოლო ტატო გრიგალაშვილი პირველივე ეტაპზე ყატარელ - მორად ზემორთან იჭიდავებს, ხოლო გამარჯვების შემთხვევაში კი -81 კგ წონით კატეგორიის ლიდერ იაპონელს - ტაკანორი ნაგასეს შეებრძოლება.
III საშეჯიბრო დღე
მესამე საშეჯიბრო დღით დასრულდება დიუსელდორფის გრან სლემი და საქართველოს ნაკრების უძლიერესი შემადგენლობა სწორედ ბოლო დღეს იჭიდავებს, ესენი არიან: ბექა ღვინიაშვილი და ლაშა ბექაური (-90 კგ); ნიაზ დიასამიძე და გიორგი ჩიქოვანი (-100 კგ); ონისე ბუღაძე და გურამ თუშიშვილი (+100 კგ).
-90 კგ წონით კატეგორიაში ორივე ქართველი განთესილია და ორივე ქართველი ერთ B ბადეში მოხვდა. ბექა ღვინიაშვილი მეორე ეტაპზე ყირგიზ - ერლან შეროვს და ეგვიპტელ - ალი ჰამეზს შორის გამარჯვებულს შეხვდება, ხოლო ლაშა ბექაური კი ლატვიელ - ალექსეი ზარუდნევსა და მავრიტანიელ - რემი ფეულეტს შორის გამარჯვებულს დაუპირისპირდება.
-100 კგ წონით კატეგორიაში ნიაზ დიასამიძეს მეტოქე კენიელი - ჯორჯ კიმანი იქნება, ხოლო გიორგი ჩიქოვანის კი ყაზახი - აიბეკ სერიკბაიევი.
რაც შეეხება მძიმე წონას, +100 კგ-ში 2018 წლის მსოფლიო ჩემპიონი - გურამ თუშიშვილი, საქმეში მეორე ეტაპიდან ჩაერთვება და მისი მეტოქე უზბეკი - ალიშერ იუსუფოვი იქნება, გამარჯვების შემთხვევაში კი 2018 წლის ფინალი განმეორდება, სადაც გურამის მეტოქე წარმოშობით ქართველი, აზერბაიჯანის სახელით მოასპარეზე - უშანგი კოკაური იქნება. ონისე ბუღაძე კი გერმანელ - იონას შრეიბერს დაუპირისპირდება.
Live.ge ქართველ ძიუდოისტებს წარმატებას უსურვებს.