საქართველოს 18-წლამდელთა ნაკრებმა ევროპის ჩემპიონატის B დივიზიონის მე-15 ადგილისთვის ბრძოლაში ბულგარეთი 23-ქულიანი სხვაობით, ანგარიშით 64:41 დაამარცხა და ასპარეზობა მე-15 ადგილზე დაასრულა (ტურნირში სულ 22 გუნდი მონაწილეობდა)
კიდევ ერთი გამორჩეული მატჩი ჩაატარა საქართველოს ნაკრების უკანახაზელმა, გიორგი ოჩხიკიძემ, რომელმაც 29 წუთში 22 ქულა, 4 შედეგიანი გადაცემა, 4 მოხსნა და 3 ჩაჭრა მოაგროვა. გიორგიმ 9-დან 4 ორქულიანი, 6-დან 3 სამქულიანისა და 6-დან 5 საჯარიმოს ჩაგდება შეძლო. 8 ქულა, 17 მოხსნა და 1 პასი იყო გიორგი სულაბერიძის ანგარიშზე.
ბულგარელებს 10 ქულით, 4 მოხსნითა და 1 ასისტით ილიან პიშტიკოვმა ულიდერა.
საქართველომ ევრობასკეტზე გამართული 8 შეხვედრიდან 4-ში იმარჯვა, 4-ში კი დამარცხდა. დავით როგავას გუნდმა ჯგუფში მე-4 ადგილი დაიკავა, შემდეგ კი უკრაინასთან და უნგრეთთან წააგო.
ევრობასკეტის B დივიზიონის ფინალში შვედეთმა დანიას მოუგო და ტურნირის გამარჯვებული გახდა.
