"ალბათ საუკეთესო მატჩია, რომელიც ჩაგვიტარებია" - თორნიკე შენგელია

საქართველოს ნაკრებმა თბილისში მორიგი გამორჩეული მატჩი ჩაატარა - მსოფლიო ჩემპიონატის საკვალიფიკაციო შეხვედრაში, ესპანეთთან გარკვეული დროის განმავლობაში 22 ქულითაც კი ვაგებდით, მაგრამ ნაკრებმა მე-4 პერიოდში გარდატეხა შეიტანა და ოვერტაიმში 91:89 გაიმარჯვა.

თორნიკე შენგელიამ და მარკის რიდმა უმაღლესი დონის მატჩი ჩაატარეს. შენგელიამ 37 ქულა, 10 მოხსნა და 2 ასისტი გაიფორმა, რიდმა კი 32 ქულასთან ერთად, 3 მოხსნა და 7 შედეგიანი გადაცემა დააგროვა.

მატჩის დასრულების შემდეგ გამართულ პრესკონფერენციაზე ალექსანდარ ჯიკიჩმა და თორნიკე შენგელიამ ერთხმად აღნიშნეს, რომ ეს იყო ერთ-ერთი საუკეთესო შეხვედრა, რომელიც ნაკრებს ოდესმე ჩაუტარებია.

თორნიკე შენგელიამ ესპანეთთან ჩაგდებული 37 ქულით, სანაკრებო რეკორდი დაამყარა. აქამდე კაპიტნის საუკეთესო მონაგარი 31 ქულას შეადგენდა.

საქართველოს ეროვნულმა საკალათბურთო ნაკრებმა A-ჯგუფში ასპარეზობა 3 მოგებითა და 3 მარცხით, მე-3 ადგილზე დაასრულა. ამ შედეგით ჩვენი ნაკრები ესპანეთთან და უკრაინასთან ერთად მე-2 ჯგუფურ ეტაპზე გავიდა, სადაც B-ჯგუფის საუკეთესო სამეულს დაუპირისპირდება.

B-ჯგუფის საუკეთესო სამეულს საბერძნეთი, მონტენეგრო, პორტუგალია და რუმინეთი გაარკვევენ. ნაკრებებს პირველი ეტაპის შედეგები გადაჰყვებათ და მე-2 ეტაპზე მხოლოდ მათ შეხვდებიან, ვისთანაც მანამდე არ უთამაშიათ - საბოლოოდ, ჯგუფების 3-3 საუკეთესო ნაკრები მსოფლიოს ჩემპიონატზე გავა.