ტედ ლასოს მსახიობი ვილნიუსის ქალთა გუნდის მწვრთნელად მიიწვიეს

ლიეტუვის დედაქალაქური კლუბის ქალთა გუნდმა პოპულარული სერიალის, „ტედ ლასოს“ მთავარი როლის შემსრულებელს, ჯეისონ სუდეიკისს რეალურ ცხოვრებაში მწვრთნელის ამპლუას მორგება და ამ შემოდგომაზე ვილნიუსის ქალთა საფეხბურთო გუნდის მწვრთნელობა შესთავაზა.

ვილნიუსის ჟალგირისმა, ქალაქის ტურიზმისა და ბიზნესის განვითარების სააგენტო 'Go Vilnius'-მა და მედიაორგანიზაცია 'Laisvės TV'-იმ ძალები გააერთიანეს და ჰოლივუდის ვარსკვლავს ოფიციალური მოწვევა გაუგზავნეს, რათა იგი ლიეტუვას ეწვიოს და ჟალგირისის ქალთა მთავარი მწვრთნელის პოსტი სულ მცირე ერთი კვირით დაიკავოს.

ეს უჩვეულო ინიციატივა „ტედ ლასოს“ მეოთხე სეზონის სიუჟეტს უკავშირდება, სადაც სუდეიკისის პერსონაჟი, ამერიკელი მწვრთნელი ქალთა საფეხბურთო გუნდის გაძღოლას იწყებს. 'Apple TV'-ის გლობალურ სერიალს 139 ნომინაცია და 40 ჯილდო აქვს მოპოვებული. ვილნიუსის ოფიციალურმა პირებმა განაცხადეს, რომ სურდათ ლიეტუვური ფესვების მქონე მსახიობისთვის მიეცათ შანსი, ეს სიუჟეტი რეალურ ცხოვრებაში გამოეცადა და ქვეყნის A ლიგის წამყვან ქალთა გუნდს სათავეში ჩასდგომოდა.

ორგანიზატორების თქმით, სუდეიკისს სრული თავისუფლება და პროფესიონალი სამწვრთნელო შტაბის მხარდაჭერა ექნება, რათა ვარსკვლავის დებიუტი „ტედ ლასოს“ ეპიზოდივით ზედმეტად დრამატული არ აღმოჩნდეს. თანხმობის შემთხვევაში, ვილნიუსი მსახიობს სტადიონს მიღმაც საინტერესო პროგრამას ჰპირდება, რომლის შთაგონებაც პერსონაჟი „მწვრთნელი ბირდია“. - ტედის ასისტენტი, რომელიც უცნაური ადგილების მიმართ ინტერესით გამოირჩევა.

ვილნიუსის „ჟალგირისის“ პრეზიდენტმა და 'Laisvės TV'-ის ხელმძღვანელმა, ანდრიუს ტაპინასმა აღნიშნა, რომ პროექტის მთავარი მიზანი ქალთა სპორტზე ყურადღების გამახვილება და ვილნიუსის შემოქმედებითი პოტენციალის ჩვენებაა.

ორგანიზატორების ცნობით, ოფიციალური მიწვევა სუდეიკისის გარემოცვამდე უკვე მივიდა, პარალელურად კი სოციალურ ქსელებში კამპანია დაიწყო, რათა მსახიობი და სერიალის ავტორები გამოწვევის მიღებაში დარწმუნდნენ. თუ მხარეები შეთანხმდებიან, ჟალგირისის მატჩი ჯეისონ სუდეიკისის ხელმძღვანელობით ვილნიუსში ამ შემოდგომაზე გაიმართება.