ვინისიუსმა მუნდიალებზე გატანილი გოლებით რონალდინიოსა და კაკას გადაუსწრო

სელესაოსა და მადრიდის რეალის სუპერვარსკვლავმა - ვინისიუს ჟუნიორმა, ჰაიტის ნაკრებთან მატჩში დუბლი გაიფორმა და ქვეყნის ორ ლეგენდას, რონალდინიოსა და კაკას მსოფლიო ჩემპიონატებზე გატანილი გოლების რაოდენობით გადაუსწრო.

ჰაიტელთა კარის ორჯერ აღებით ვინიმ მუნდიალებზე თავისი მონაგარი 3 გოლამდე გაზარდა, მაშინ როცა ლეგენდარულ რონალდინიოს მსოფლიო პირველობებზე 2 გოლი აქვს გატანილი, ხოლო „ოქროს ბურთის“ კიდევ ერთ მფლობელ კაკას – მხოლოდ ერთი.

ბევრს შესაძლოა დაავიწყდა კიდეც, თუ როდის დაიწყო ვინისიუსმა მუნდიალებზე გოლების ათვლა. შეგახსენებთ, რომ ბრაზილიელთა 7-იანმა, მსოფლიო ჩემპიონატზე თავისი სადებიუტო გოლი 2022 წელს, ყატარის მუნდიალზე გაიტანა. ეს 1/8 ფინალურ ეტაპზე მოხდა, როდესაც ბრაზილიამ სამხრეთ კორეის ნაკრები 4:1 გაანადგურა, ანგარიში კი სწორედ ვინისიუსმა გახსნა.

25 წლის ასაკში ასეთი დიდი ფეხბურთელების სტატისტიკის გაუმჯობესება იმაზე მეტყველებს, რომ ვინისიუს ჟუნიორი ნელ-ნელა ბრაზილიური ფეხბურთის მთავარ ისტორიულ ფიგურად ყალიბდება. ჰაიტისთან მატჩში ნაჩვენები ბრწყინვალე პერფორმანსის შემდეგ, არის მოლოდინი,, რომ მიმდინარე ტურნირზე ის ამ ნიშნულს კიდევ უფრო გაზრდის და ნაკრებს უმთავრესი ტიტულისკენ გაუძღვება.