სპალეტი: "ვისაც ღამით ძილი არ უნდა, ჩვენთან არ არის"

იტალიის საფეხბურთო ნაკრებმა შეკრება დაიწყო. გუნდი აშშ-ში გამგზავრებისთვის ემზადება, სადაც ხუთშაბათს ამხანაგურ მატჩს ვენესუელის ნაკრების წინააღმდეგ, ხოლო კვირას ეკვადორთან ითამაშებენ. მთავარი მწვრთნელის, ლუჩიანო სპალეტის პრესკონფერენციაზე, ჟურნალისტი "ფლეისთეიშენის" აკრძალვის თემას შეეხო, სპალეტიმ კი დამატებითი კომენტარი გააკეთა.

იტალიის ეროვნულმა ნაკრებმა, უკანასკნელი შეხვედრა, ევრო 2024-ის საკვალიფიკაციო ეტაპზე, გასული წლის ნოემბერში, უკრაინის ნაკრების წინააღმდეგ, სტუმრად ჩაატარა და მატჩი ფრედ 0:0 დასრულდა. უკრაინამ და იტალიამ 14-14 ქულა დააგროვეს, თუმცა ურთიერთშეხვედრებში უპირატესობის გამო ჯგუფში მეორე ადგილი იტალიამ დაიკავა, პირველზე 20 ქულით ინგლისი გავიდა. სწორედ უკრაინასთან შეხვედრით უკმაყოფილება ახსენა სპალეტიმ თებერვლის თვეში, როდესაც პირველად გააკეთა განცხადება, რომ ნაკრებში ფეხბურთელებს ვიდეო თამაშებს აუკრძალავდა.