საქართველო ბაჰრეინთან თამაშისთვის ემზადება, კვარაცხელია ძირითადშია

ხვალ საქართველოს ნაკრები კიდევ ერთ ამხანაგურ შეხვედრას ჩაატარებს. ამჯერად მეტოქე ბაჰრეინია. ხვიჩა კვარაცხელია, რომელიც წინა დაპირისპირებაში, რუმინეთის წინააღმდეგ, არ თამაშობდა, ამჯერად, მატჩს ძირითადი შემადგენლობიდან დაიწყებს. რუმინეთთან შეხვედრაში, ბოლო სანაკრებო თამაში ჰქონდა გურამ კაშიას. 38 წლის ფეხბურთელს, ეროვნულ ნაკრებში 129 მატჩი აქვს ჩატარებული, ხოლო კაპიტნის სამკლაური 50-ზე მეტ შეხვედრაში მოირგო. როგორც გურამმა აღნიშნა, მის შემცვლელად და საქართველოს ნაკრების მომავალ კაპიტნად, სწორედ ხვიჩა კვარაცხელიას ხილვა სურს.

უეფას ერთა ლიგისთვის, რომელიც სექტემბერში დაიწყება, გუნდის სათამაშო ფორმის შესანარჩუნებლად, ამხანაგურ მატჩებს დიდი მნიშვნელობა ენიჭება. წინა შეხვედრაში, საქართველოს ნაკრებმა, რუმინეთის წინააღმდეგ ფრედ - 1:1 ითამაშა. იმედი ვიქონიოთ, რომ „ჯვაროსნები“, ხვალინდელ მატჩში, გამარჯვების მოპოვებას შეძლებენ.

საქართველოსა და ბაჰრეინის დაპირისპირება ხვალ, 5 ივნისს, „მიხეილ მესხის“ სახელობის სტადიონზე გაიმართება. მატჩი საღამოს 20:00სთ-ზე დაიწყება.