რეალი მასტანტუონოს იჯარით გაშვებას გეგმავს - იტალიის სერია A ყველაზე რეალური ვარიანტია

„Marca“-ს ინფორმაციით, მადრიდის რეალი ზაფხულის სატრანსფერო ფანჯრის განმავლობაში ფრანკო მასტანტუონოს დიდი ალბათობით იჯარით გაუშვებს. კლუბისა და ფეხბურთელის წარმომადგენლებს შორის გამართული შეხვედრის შემდეგ, მხარეები შეთანხმდნენ, რომ დროებითი ტრანსფერი 18 წლის არგენტინელის განვითარებისთვის საუკეთესო გამოსავალია.

მასტანტუონომ „სანტიაგო ბერნაბეუზე“ სადებიუტო სეზონში სტაბილური სათამაშო დრო ვერ მიიღო. „სამეფო კლუბში“ მიაჩნიათ, რომ მისი პოტენციალის სრულად წარმოსაჩენად რეგულარული პირველი გუნდის ფეხბურთი აუცილებელია. 

ერთ-ერთ ვარიანტად განიხილებოდა მასტანტუონოს რივერ პლეიტის რიგებში დაბრუნებაც, თუმცა მადრიდელებმა ეს შესაძლებლობა მალევე გამორიცხეს. კლუბის პოზიცია მკაფიოა - ფეხბურთელმა კარიერის განვითარება ევროპაში უნდა გააგრძელოს. ასევე გამორიცხულია ინგლისის პრემიერ ლიგაში გადასვლაც, რის გამოც ყველაზე რეალურ მიმართულებად იტალიის სერია A მიიჩნევა.

18 წლის ნახევარმცველს იტალიის მოქალაქეობაც აქვს, რაც ტრანსფერს მნიშვნელოვნად ამარტივებს. იმავე წყაროს ცნობით, ფიორენტინამ უკვე ოფიციალურად მიმართა რეალს იჯარის თაობაზე. გარდა ამისა, განიხილება ნაპოლისა და მილანის ვარიანტებიც.

მიუხედავად იმისა, რომ ფეხბურთელის მომავალი ჯერ კიდევ გაურკვეველია, მასტანტუონოს ახალი მთავარი მწვრთნელის, ჟოზე მოურინიოს, მიმართ დადებითი დამოკიდებულება აქვს. თუმცა ჯერჯერობით უცნობია, გაემგზავრება თუ არა ის გუნდთან ერთად სეზონისწინა მოსამზადებელ ტურნეზე. რეალი უახლოეს კვირებში ყველა შემოთავაზებას დეტალურად განიხილავს, საბოლოო გადაწყვეტილების მიღებამდე კი ახალგაზრდა არგენტინელს საკუთარი მომავლის გარკვევა მოუწევს.