პსჟ-სა და ატლეტიკოს მატჩს 80 000-ზე მეტი გულშემატკივარი დაესწრო

FIFA-ს საკლუბო მსოფლიო ჩემპიონატზე, პსჟ-სა და ატლეტიკო მადრიდს შორის მატჩზე, რომელიც ლოს ანჯელესში, როუზ ბოულის სტადიონზე გაიმართა, 80 000-ზე მეტი ენთუზიაზმით აღსავსე გულშემატკივარი დაესწრო. ეს იყო ჩემპიონთა ლიგის გამარჯვებულის, პსჟ-ს პირველი შეხვედრა ამერიკის მიწაზე, ამიტომ პარიზული გრანდის თამაშმა დიდი ინტერესი გამოიწვია. აღსანიშნავია, რომ დასწრების ეს მაჩვენებელი, მიმდინარე სეზონში, ორივე გუნდისთვის სარეკორდო იყო.

ჯგუფური ეტაპის ამ საინტერესო შეხვედრაში, პსჟ-მ ატლეტიკო მადრიდზე სრული დომინირება აჩვენა და დამაჯერებელი გამარჯვება მოიპოვა (4:0). ფაბიან რუისმა მე-19 წუთზე გაიტანა, ვიტინიამ კი პირველივე ტაიმში გააორმაგა სხვაობა - ორივეს საგოლე გადაცემა ხვიჩა კვარაცხელიამ გაუკეთა. მეორე ტაიმში პსჟ-მ კიდევ 2 უპასუხო გოლი გაიტანა.