პარაგვაის მეკარე: "მბაპემ რომ ხელი არ ჩამომართვა, ძალიან გავბრაზდი"

მუნდიალის მერვედფინალურ ეტაპზე საფრანგეთის ნაკრებმა მინიმალური ანგარიშით, 1:0 დაამარცხა პარაგვაის ნაკრები და 1/4-ფინალური ეტაპის საგზური მოიპოვა. მატჩის ერთადერთი და გადამწყვეტი გოლი თერთმეტმეტრიანი დარტყმით კილიან მბაპემ გაიტანა.

ეს შეხვედრა მსოფლიო ჩემპიონატების ისტორიაში, შესაძლოა, ერთ-ერთ ყველაზე უცნაურ და სკანდალურ მატჩად შეფასდეს, რისი მიზეზიც მოედანზე გადამეტებული უხეშობა და არბიტრის საკამათო გადაწყვეტილებები გახდა. პარაგვაელი ფეხბურთელები მოედანზე საფეხბურთო მატჩის ნაცვლად, პირდაპირი გაგებით, MMA-ის ორთაბრძოლას მართავდნენ და ფრანგებზე ფიზიკურად ძალადობდნენ. მიუხედავად ამისა, მატჩის მთავარმა მსაჯმა, უზბეკმა ილგიზ ტანტაშევმა, პარაგვაელთა აგრესიას თვალი დახუჭა და შეხვედრაში მხოლოდ სამი ყვითელი ბარათი გამოიყენა - სამივე ფრანგი ფეხბურთელების წინააღმდეგ, რაც ნამდვილად კომიკურია.

მატჩის დასრულების შემდეგ მოედანზე ორივე გუნდის მხრიდან ძალიან დიდი ემოციები იყო. პარაგვაის ნაკრების მეკარემ - ორლანდო ხილმა, მედიასთან საუბრისას აღნიშნა, რომ შეხვედრის საფინალო სასტვენის შემდეგ კილიან მბაპესთან მიახლოება და გამარჯვების მილოცვა სურდა, თუმცა ფრანგი ვარსკვლავისგან სრული იგნორირება მიიღო.

სოციალურ ქსელებში აქტიურად მსჯელობენ იმაზე, თუ რამ გამოიწვია მბაპეს ასეთი რეაქცია (არადა რთული მისახვედრი საერთოდ არ უნდა იყოს). ფრანგების ლიდერმა ემოციურ ფონზე უბრალოდ ვერ შეამჩნია მეტოქის ჟესტი, თუ ეს მიზანმიმართული ნაბიჯი იყო.

თუ გავითვალისწინებთ იმ ფაქტს, რომ პარაგვაელები მთელი მატჩის განმავლობაში მოედანზე უკიდურესად უხეშად, ხშირად კი აგრესიულად იქცეოდნენ და ფრანგებზე პირდაპირ ფიზიკურად ძალადობდნენ, სრულიად ლოგიკურია, რომ მბაპეს მეტოქის მიმართ ყოველგვარი პატივისცემის გამოხატვის სურვილი დაკარგული ჰქონდა.

საფრანგეთმა მძიმე და ფიზიკურად დამღლელ ბრძოლაში ხასიათის სიმტკიცე გამოავლინა. მსაჯის მხრიდან აშკარა არათანმიმდევრული მსაჯობისა და მეტოქის აგრესიული ქმედებების მიუხედავად, დეშამის გუნდმა უმნიშვნელოვანესი გამარჯვება მოიპოვა და ახლა უკვე ტურნირის 1/4-ფინალში გავიდნენ.

1/4-ფინალში ფრანგების მეტოქე მაროკოს ნაკრები იქნება - მატჩი 10 ივლისს გაიმართება.