ნეაპოლურ-მილანური მედიის პროგნოზები: კვარა VS ლეაო - ორი საუკეთესო გარემარბის დაპირისპირება

სანაკრებო პაუზის დასრულების შემდეგ, კვლავაც საკლუბო სეზონის დრო დგება, რომელიც დასკვნით ფაზაში შედის და შეიძლება ითქვას, რომ გადამწყვეტი მესამედიც იწყება. აპრილის თვეს საქართველოს ნაკრების ლიდერის, ხვიჩა კვარაცხელიას გუნდი "მილანთან" სერია A-ს 28-ე ტურის ეგიდით გასამართი შეხვედრით დაიწყებს. "ნაპოლის" მიერ საშინაო კედლებში ჩასატარებელი შეხვედრის შესახებ როგორც ნეაპოლური, ისე მილანური სპორტული მედია აქტიურად საუბრობს და განსხვავებულ პროგნოზებს გვთავაზობს, თუმცა მოლოდინი საერთოა - ეს იტალიის სერია A-ში მოთამაშე ორი საუკეთესო გარემარბის დაპირისპირება იქნება.

ვნახოთ, თუ რას წერენ იტალიურ პრესაში მოახლოებული მნიშვნელოვანი მატჩის შესახებ:

napolipiu.com (ნეაპოლური გამოცემა): "ნაპოლი"-"მილანის" დუელი იქნება გამოწვევა ხვიჩა კვარაცხელიასა და რაფაელ ლეაოს შორის, აპრილში სერია A-სა და ჩემპიონთა ლიგის ეგიდით გასამართი სამი დაპირისპირების მთავარი გმირები.​

იტალიური ფეხბურთი სავსეა მომხიბლავი ისტორიებით და "ნაპოლისა" და "მილანს" შორის დაპირისპირება ერთ-ერთი ყველაზე ინტენსიური და ამაღელვებელია. ტიტანების ამ შეტაკების გმირებს შორის არის ორი ახალგაზრდა ნიჭიერი მოთამაშე, რომლებიც იზიარებენ მარცხენა ფლანგს, როგორც გამარჯვებისთვის მთავარ იარაღს: კვარაცხელია "ნაპოლიდან" და ლეაო "მილანიდან".

კვარაცხელია, როგორც მას გულშემატკივრები უწოდებენ - "კვარადონა", საოცნებო სეზონს ატარებს. ლიგაში 12 გოლით და 10 საგოლე გადაცემით, ხოლო ჩემპიონთა ლიგაზე კიდევ 2 გოლით და 4 საგოლე პასით, ახალგაზრდა ქართველმა ნეაპოლიტანელი გულშემატკივრების პატივისცემა და აღფრთოვანება დაიმსახურა. მაგრამ ეს ყველაფერი არ არის: მისმა სანახაობრივმა და შემქმნელი სტილის თამაშმა ასევე შეაღწია ნეიტრალური ქომაგების გულებში, რომლებსაც შეუძლიათ მხოლოდ აღფრთოვანებულიყვნენ მისი კლასით და სიმტკიცით.

კვარაცხელია სტატისტიკით უკეთესია, მეორე მხრივ კი ლეაო არის ლეაო. ისიც ახალგაზრდა ტალანტია, მასაც ძლიერი და ზუსტი ფეხი აქვს. მაგრამ წელს, კვარაცხელიასგან განსხვავებით, უმაღლეს დონეზე თავისი შესაძლებლობების სრულად დემონსტრირება ვერ შეძლო. მიუხედავად იმისა, რომ მან აჩვენა მაღალი კლასის გამონათებები, პორტუგალიელმა ვერ შეძლო თამაშის უწყვეტობის შენარჩუნება, რაც მის 8 გოლსა და 6 საგოლე პასში სერია A-ში, ხოლო ჩემპიონთა ლიგაზე ერთ გოლსა და სამ საგოლე პასში აისახა.

კვარაცხელიასა და ლეაოს დუელი მიმდინარე სეზონის ერთ-ერთი ყველაზე დიდი სანახაობა იქნება. ისინი ერთმანეთს სამჯერ შეხვდებიან: კვირას ლიგაში, შემდეგ კი ორჯერ ჩემპიონთა ლიგის მეოთხედფინალში.

ეს იქნება ამაღელვებელი დერბი, ემოციებისა და ტრადიციების გზაჯვარედინზე, სადაც ორი გუნდის ბედი ასევე დამოკიდებული იქნება მათი ორი ნიჭიერი მარცხენა ვინგერის მიერ გაკეთებულ საქმეზე.

მაგრამ მხოლოდ კვარაცხელია და ლეაო არ არიან ამ ისტორიის გმირები. არიან მათი წინამორბედებიც, დიდი ჩემპიონები, რომლებმაც შექმნეს ნეაპოლისა და მილანის ისტორია. მარადონა, გულიტი, ვან ბასტენი, კარეკა: სახელები, რომლებიც აღძრავს მძაფრ ემოციებს და წარუშლელ მოგონებებს. შემდეგ კი არიან ახალგაზრდა ტალანტები, რომლებიც წარმოადგენენ ევროპული ფეხბურთის მომავალს, როგორიცაა კვარაცხელია და ლეაო. ორი განსხვავებული მოთამაშე, მაგრამ ორივე აღჭურვილია ძლიერი და ზუსტი ფეხებით, რომლებიც ნერგავენ დიდი ფეხბურთის საფუძვლებს, გოლებს, პასებს, ცეცხლოვან ეპიზოდებს და ილეთებს.

ამ მემარცხენე დუელში, როგორც ჩანს, უპირატესობა "ნაპოლის" აქვს, კვარაცხელია ფანტასტიკურ სეზონს ატარებს, რომელმაც უკვე დაიპყრო ნეაპოლიტანური გულშემატკივრების გული, მაგრამ ფეხბურთი ყოველთვის სავსეა მოულოდნელობებით და "მილანი" ადვილად არ დანებდება. გაიმართება სამი დაძაბული, ამაღელვებელი და დაუვიწყარი მატჩი, სადაც მარცხნივ ორი ახალგაზრდა ტალანტის ნიჭი და კლასი იქნება წარმოჩენილი - აბსოლუტური პროტაგონისტები".

sempremilan.com (მილანური გამოცემა): "მომავალ თვეში "მილანი" და "ნაპოლი" სამჯერ დაუპირისპირდებიან ერთმანეთს და ლიგის ორ საუკეთესო გარემარბს ხვიჩა კვარაცხელიასა და რაფაელ ლეაოს დუელს ვიხილავთ. Corriere dello Sport-ის დღევანდელი დილის გამოცემა საუბრობს მარცხენა ფლანგზე გამართულ ბრძოლაზე, რომელსაც ლეაო და კვარაცხელია შექმნიან. პირველი დაპირისპირება კვირას გაიმართება, შემდეგ კი ჩემპიონთა ლიგის მეოთხედფინალის ორი მატჩი 12 და 18 აპრილს გაიმართება.

პორტუგალიელი და ქართველი სუპერვარსკვლავები სკუდეტოსთვის მებრძოლი პრეტენდენტების წევრები იყვნენ, მაგრამ ახლა, მათთვის სეზონი განსხვავებულად მიმდინარეობს და ძალიან განსხვავებულ მომენტებს განიცდიან.

ეს კვარაცხელიას წელია, მას ლიგაში 12 გოლი და 10 საგოლე გადაცემა აქვს, რაც ჩემპიონთა ლიგასაც თუ ჩავთვლით, 14-14 ხდება. მეორეს მხრივ, ლეაოს შარშანდელზე მეტად უჭირს, "მილანმაც" შეანელა ტემპი.

ისინი არასდროს შეხვედრიან ერთმანეთს, რადგან სეზონის პირველ მატჩში ლეაო დისკვალიფიცირებული იყო. ეს იქნება უპრეცედენტო შოუ, კვარაცხელიას "ნაპოლისა" და ლეაოს "მილანს" შორის".

ხვიჩა კვარაცხელიას, 2022/23 წლების სეზონში “ნაპოლის” შემადგენლობაში 29 მატჩში 14 გოლი აქვს გატანილი და 14 საგოლე პასი გაკეთებული. მის აქტივში ასევე 5 მოპოვებული პენალტია.