ჯაბა კანკავა და გურამ კაშია შემდეგ სეზონშიც სლოვანში ითამაშებენ

საქართველოს ნაკრების ყოფილი და მოქმედი კაპიტნები, შესაბამისად ჯაბა კანკავა და გურამ კაშია ბრატისლავის "სლოვანთან" კონტრაქტს გაახანგრძლივებენ.

​ამასთან დაკავშირებით, კლუბის გენერალურმა დირექტორმა ივან კმოტრიკ უმცროსმა განაცხადა.

"ვლადკო ვაის უმცროსი ბოლო 4 სეზონის განმავლობაში ჩვენი თეთრი ოჯახის განუყოფელი ნაწილია. განსაკუთრებით ამ სეზონში, ის ნათლად აჩვენებს, რომ ჯერ კიდევ ბევრის შემოთავაზება შეუძლია უმაღლეს დონეზეც კი, როგორიცაა ევროპული თასების მატჩები ან ჩვენი ფორტუნა ლიგა.

ჩვენ შეგვიძლია ვივარაუდოთ და ველით, თუ რა ფორმაში იქნება ის მომავალ სეზონში. ძალიან მიხარია, რომ მე და ვლადი შევთანხმდით ჩვენი მომავალი თანამშრომლობის პირობებზე.

ამჟამად ვასრულებთ ახალი კონტრაქტის ბოლო დეტალებს. ამიტომ მალე შეგატყობინებთ შედეგს.

ელიტარული წყვილი, გურამ კაშია და ჯაბა კანკავა მომავალ სეზონშიც ჩვენი თეთრი ოჯახის ნაწილი იქნება.

თავიანთი გამოსვლებით ისინი ყოველ მატჩში საყრდენი იყვნენ და თქვენ, გულშემატკივრებმა, ტრიბუნებიდან დიდი მხარდაჭერით დააჯილდოვეთ ისინი.

ევროპის თასებზე და ასევე ჩვენს ლიგაში გამართულმა ბრძოლებმა დაგვანახა, რომ ჩვენ გვყავს მყარი საფუძველი ფეხბურთელებისა, რომლებიც მზად არიან მთელი ძალით იბრძოლონ თეთრი მაისურისთვის.

ამიტომ ძალიან ბედნიერი ვარ, რომ ორივე ეს ფეხბურთელი ჩვენთან ერთად გააგრძელებს ყოფნას. სხვა სიახლეებს მალე შეგატყობინებთ", - თქვა კმორტრიკმა.

საქართველოს ნაკრებში საერთო ჯამში 202 შეხვედრის ჩამტარებელმა ფეხბურთელებმა "სლოვანის" მაისური 2021/22 წლების სეზონის დასაწყისში მოირგეს და პირველ წელს ფორტუნა ლიგის მოგება და თასის ვერცხლის მედლის დაუფლება მოახერხეს, მიმდინარე სეზონში კი ზედიზედ მეორე ფინალური მარცხის შემდეგ, მიჯრით მეორე ჩემპიონობას 1 ქულის მოპოვება აშორებთ.