ინგლისში 11-წლამდე ფეხბურთელებს თავით თამაში აეკრძალებათ

ინგლისში 11-წლამდე ფეხბურთელებს ბურთზე განძრახ თავით თამაში აეკრძალებათ - ამ გადაწყვეტილების მიზეზი ბავშვების ჯანმრთელობის უსაფრთხოების ზრდაა.

ფეხბურთის ასოციაციამ (FA) გამოაცხადა, რომ ეტაპობრივად დაიწყებს აკრძალვის შემოღებას. იდეა დაახლოებით ორი წლის განმავლობაში იყო განხილვის საგანი. განზრახ თავით თამაში არაპირდაპირი საჯარიმო დარტყმით დაისჯება. 7-დან 9 წლამდე ბავშვები თავით თამაშს შემდეგი სეზონიდან შეწყვეტენ, 10-წლამდე - 2025/26 სეზონიდან, ხოლო 11-წლამდე - 2026/27 სეზონიდან. 12 წლიდან შეზღუდვა აღარ იმოქმედებს.

ეს ღონისძიება ეყრდნობა კვლევას, რომლის მიხედვითაც ყოფილი ფეხბურთელები უფრო მეტად იღუპებიან ტვინის პრობლემების გამო, ვიდრე სხვა პროფესიის წარმომადგნელები. მაგალითად, პროფესიონალი ფეხბურთელები სამნახევარჯერ უფრო ხშირად იღუპებიან დემენციით, ვიდრე იმავე ასაკის საშუალო სტატისტიკური ადამიანი.