ფენერბაჰჩესა და გალათასარაის ფეხბურთელები დააკავეს - მათ პატიმრობა ემუქრებათ

თურქულ ფეხბურთში ფსონების უკანონო განთავსებაზე სკანდალი გრძელდება - თურქეთის სასამართლომ დააპატიმრა გალათასარაის ფეხბურთელი - მეტეჰან ბალტაჩი და ფენერბაჰჩეს ფეხბურთელი - მერტ ჰაკან იანდასი.

თურქეთის სასამართლომ დააპატიმრა 20 ეჭვმიტანილი, მათ შორის სუპერლიგის ფეხბურთელები, რომლებიც ელოდებიან სასამართლო პროცესს, ფსონების გაფართოების გამოძიების ფარგლებში, იტყობინება სახელმწიფო საინფორმაციო სააგენტო 'Anadolu'.

გასულ კვირას თურქმა პროკურორმა, თურქეთის პროფესიონალურ ლიგებში უკანონო ფსონების განთავსების გამო 46 ადამიანის, მათ შორის ფეხბურთელების, კლუბების პრეზიდენტების, კომენტატორებისა და მსაჯის დაკავების ბრძანება გასცა.

'Anadolu'-ს განცხადებაში ვკითხულობთ, რომ ამ ოპერაციაში დაკავებულთა შორის, გალათასარაის ფეხბურთელი მეტეჰან ბალტაჩი და ფენერბაჰჩეს მოთამაშე მერტ ჰაკან იანდასი არიან, ასევე ადანა დემისპორის ყოფილი პრეზიდენტი მურატ სანჩაკი ახლა ოფიციალურად დააპატიმრეს.

თურქული მედია იტყობინება, რომ ბალტაჩიმ სასამართლოს განუცხადა, რომ მან დადო ფსონი რამდენიმე მატჩზე, როდესაც ის ახალგაზრდული გუნდის მოთამაშე იყო და ეს არ გაუკეთებია მას შემდეგ, რაც გალათასარაის პირველ გუნდში დაწინაურდა - ფენერბაჰჩეს ფეხბურთელმა იანდასმა კი უარჰყო აზარტულ თამაშებში მონაწილეობა.

შეგახსენებთ, რომ გასულ თვეში, თურქეთის ფეხბურთის ფედერაციამ (TFF) 149 მსაჯსა და ასისტენტს ლიცენზია მას შემდეგ შეუჩერა, რაც გამოძიებამ დაადგინა, რომ პროფესიული ლიგის ოფიციალური პირები თამაშებზე ფსონებს დებდნენ.