ფეხბურთში შავი ბარათი უკვე რეალურია

შავი ბარათი უკვე რეალობაა. რუმინეთის ფეხბურთის ფედერაციამ (FRF), 11 სექტემბერს, ახალი რეგულაციის ამოქმედება გამოაცხადა. წესების დარღვევის შემთხვევაში, გამოიყენება სპეციალური ბარათი, რომლის მიზანიც ბავშვთა ფეხბურთში, მშობლებისა და მაყურებლების მხრიდან შეურაცხმყოფელი თუ უადგილო ქცევის საბოლოოდ აღკვეთაა.

ეს მსოფლიო სპორტში პრეცედენტული და ნოვატორული ნაბიჯია:

შავი ბარათის დანიშნულება სრულიად კონკრეტულია და ის მატჩის საბოლოო შეწყვეტას გულისხმობს: „შავი ბარათი არის ვიზუალური სიგნალი, რომლითაც არბიტრი ცალსახად აცხადებს, რომ შეხვედრა მაყურებლების ან მშობლების არასათანადო ქცევის გამო საბოლოოდ წყდება. შეურაცხმყოფელი ქცევა გავლენას ახდენს არა მხოლოდ თამაშის მსვლელობაზე, არამედ შესაძლოა პირდაპირი უარყოფითი შედეგები ჰქონდეს ბავშვებსა და მთლიან გუნდზე“.

შავი ბარათის გამოყენებამდე გათვალისწინებულია პირველადი გაფრთხილება და მატჩის დროებით, 10 წუთით შეჩერებაც კი. შეუფერებელი ატმოსფეროს შემჩნევისას, მსაჯი პირველ ეტაპზე გუნდის მწვრთნელებს სთხოვს, მიმართონ მაყურებლებს, ასევე გაკეთდება გაფრთხილება სტადიონის ხმოვანი სისტემით. თუ აგრესიული ქცევა მაინც გაგრძელდება, შეხვედრა შავი ბარათით შეწყდება, გუნდებს კი გასახდელისკენ მიუთითებენ.