"დიდი შეცდომა დავუშვი, რომ ბარსელონაში გადავედი" - ანტუან გრიზმანი

ანტუან გრიზმანმა მეტროპოლიტანოზე ატლეტიკო მადრიდის მაისური ბოლოჯერ მოირგო და ჟირონასთან მოგებული მატჩის შემდეგ (1:0) ადგილობრივ გულშემატკივარს დაემშვიდობა, აღსანიშნავია, რომ შეხვედრაში საგოლე გადაცემაც შეასრულა. ფრანგმა ლეგენდამ შეხვედრის დასრულების შემდეგ ფანებს მიმართა და მათ კვლავ ბოდიში მოუხადა იმის გამო, რომ შეცდომა დაუშვა და ბარსელონაში გადავიდა.

ანტუან გრიზმანი ბოლო მატჩს ვილიარეალის წინააღმდეგ გამართავს. მომდევნო სეზონიდან კი ფრანგი ფეხბურთელი კარიერას MLS-ის ჩემპიონატში, კერძოდ კი ორლანდო სიტიში გააგრძელებს.

შეგახსენებთ, რომ ანტუან გრიზმანმა კარიერა 2009 წელს რეალ სოსიედადში დაიწყო, 2014 წელს კი ატლეტიკო მადრიდში გადავიდა, სადაც 2019 წლამდე ასპარეზობდა, ფრანგი ფეხბურთელის მომდევნო გაჩერება 2019-დან 2021 წლამდე ბარსელონა იყო, ხოლო დღემდე ის მადრიდულ კლუბში ასპარეზობს. ასევე აღსანიშნავია, რომ 212 გოლით ანტუან გრიზმანი ატლეტიკო მადრიდის ყველა დროის საუკეთესო ბომბარდირია.

ანტუან გრიზმანმა ატლეტიკო მადრიდის მაისური 500 შეხვედრაში მოირგო, 212 გოლი გაიტანა და 100 საგოლე გადაცემა გააკეთა. მათთან ერთად ევროპა ლიგა, უეფას სუპერთასი და ესპანეთის სუპერთასი მოიგო.