არდა გიულერი: "კარგია მოგება, მაგრამ ამ თამაშს ვივიწყებთ - წინ ელ კლასიკოა"

ჩემპიონთა ლიგის მე-3 ტურში, მადრიდის რეალმა იუვენტუსს უმასპინძლა და მინიმალური სხვაობით 1:0 დაამარცხა. მატჩის ერთადერთი გოლი ჯუდ ბელინგემმა გაიტანა, რომელსაც საგოლე გადაცემა ვინისიუსმა გაუკეთა.

მატჩის საუკეთესო ფეხბურთელად, მადრიდის რეალის 20 წლის თურქი ფეხბურთელი - არდა გიულერი დასახელდა.

მატჩის შემდეგ, არდა გიულერმა დღევანდელ გამარჯვებაზე ისაუბრა, თუმცა აღნიშნა, რომ ახლა აღნიშვნის დრო არ არის, რადგან წინ 'ელ კლასიკოა'.

მადრიდის რეალს ჩემპიონთა ლიგის ახალ სეზონში, 3 თამაშში 9 ქულა დაუგროვდა. 'სამეფო კლუბი' ჩემპიონთა ლიგის მე-4 ტურს ქულების მაქსიმალური რაოდენობით ხვდება, სადაც ლივერპულს დაუპირისპირდება.

იქამდე კი კლუბს 'ელ კლასიკო' აქვს სათამაშო, რომელიც 26 ოქტომბერს, 19:15 საათზეა ჩანიშნული.