ქართული ფეხბურთის ქომაგი გიორგი ჩაკვეტაძის მოედანზე დაბრუნებას მოუთმენლად ელის.
20 წლის ნიჭიერ ქართველ ფეხბურთელს მიმდინარე წლის თებერვლიდან მოყოლებული, მუხლის ტრავმა აწუხებს და თამაშს ვერ ახერხებს. ბელგიური გენტის შემტევმა ნახევარმცველმა ოპერაციის შემდეგ, ხანგრძლივი აღდგენითი პროცესი წარმატებით დაასრულა და რამდენიმე კვირაა, სავარჯიშო პროცესიც განაახლა.
როგორც ფეხბურთელის აგენტმა გიორგი გახოკიძემ Live.ge-სთან საუბრისას განაცხადა, ჩაკვეტაძე უკვე სრულფასოვანი დატვირთვით ვარჯიშობს და დიდი შანსია, სანაკრებო პაუზის მერე, მოედანზეც ვნახოთ.
არაა გამორიცხული, ეს 24 ნოემბერს, ბელგიის ჩემპიონატის მე-16 ტურში მოხდეს, როცა გიორგის გუნდი "ანტვერპენს" შეხვდება.
ერთა ლიგაზე გაბრწყინების შემდეგ, ჩაკვეტაძის მიმართ წამყვანი ევროპული ჩემპიონატის კლუბების ინტერესი არ შემწყდარა. არსებობდა "დორტმუნდის", "რომას" ვარიანტები, საქართველოს ნაკრების მატჩს ანდორაში კი "ბარსელონას" სკაუტებიც დაესწრნენ. ბოლო დღეებში, ეს თემა კვლავ გააქტიურდა და გავრცელდა ინფორმაცია, რომ ქართველი ფეხბურთელით "ვალენსია" დაინტერესდა. აგენტმა ეს ცნობა არ დაგვიდასტურა და გვითხრა, რომ ამ ეტაპზე მთავარია გიორგი მოედანს დაუბრუნდეს, შეთავაზებებს კი ზამთარში განიხილავენ...
ისე, ორი გიორგის ჩაკვეტაძისა და ქვილითაიას გუნდს სეზონის შესანიშნავი დასაწყისი აქვს და 14 ტურის შემდეგ მეორე ადგილზეა, თანაც მდევრებზენაკლებჯერ უთამაშია.
"დინამო თბილისის" აღზრდილ ფეხბურთელს, რომელიც მესამე სეზონია "გენტში" ირიცხება, საქართველოს ნაკრებში 7 მატჩში 5 გოლი აქვს გატანილი და 3 საგოლე პასი გაკეთებული. ერთა ლიგის ნახევარფინალისთვის მისი ფორმაში ყოფნა უმნიშვნელოვანესი იქნება...
