სენსაციური დაბრუნება 44 წლის ასაკში | სერენა უილიამსი WTA ტურში ბრუნდება!
ყველა დროის საუკეთესო ქალი ჩოგბურთელი, 44 წლის ამერიკელი - სერენა უილიამსი, ჩოგბურთს უბრუნდება.
დიდი სლემის ტურნირების 23-გზის ჩემპიონისთვის პირველი გაჩერება Queen’s Club-ის წყვილთა ტურნირი იქნება, თუმცა, გამორიცხული არ არის, რომ ლეგენდარული ამერიკელი უიმბლდონსა და აშშ-ის ღია პირველობაზეც ვიხილოთ.
An Olympic legend is set to return to the grass court this summer! 👀
— The Olympic Games (@Olympics) June 2, 2026
Serena Williams will make her #tennis return this summer at the Queen's Club Championship. 🎾🤩#Olympics | #QueensClub | @ITFTennis pic.twitter.com/EEDue74Y2T
„როგორც ჩანს, ის ფორმის აღდგენას და US Open-სთვის მომზადებას ცდილობს. ნიუ-იორკელი გულშემატკივრები უბედნიერესები იქნებიან, თუ მას ერთეულთა თანრიგში კვლავ კორტზე იხილავენ." - ლინდსი დევენპორტი (ყოფილი პირველი ნომერი).
ეს განცხადება მას შემდეგ გაკეთდა, რაც ორშაბათს WTA-მ ოფიციალურად დაადასტურა, რომ უილიამსმა „ველური ბარათი“ (Wild Card) მიიღო და მომავალ კვირას ლონდონში, ბალახის საფარის ტურნირზე წყვილებში იასპარეზებს.
სერენას კარიერაში უიმბლდონის 7 და აშშ-ის ღია პირველობის 6 ტიტული აქვს მოგებული, სანამ 2022 წელს დიდ სპორტს ჩამოშორდებოდა. რაც შეეხება წყვილებს, მან 6-ჯერ უიმბლდონზე, ხოლო 2-ჯერ ამერიკის ღია პირველობაზე იმარჯვა. ყველა ტიტული თავის უფროს დასთან, ვენუს უილიამსთან ერთად მოიგო.
„ის ნამდვილი ლეგენდაა და მისი ყურება უდიდესი ინსპირაციაა. აღფრთოვანებული ვარ, რომ კვლავ ვიხილავ კორტზე და შესაძლოა, მის წინააღმდეგ თამაშიც მომიწიოს... ეს ჩოგბურთისთვის საუკეთესო სიახლეა." - არინა საბალენკა (მოქმედი პირველი ნომერი).
ლეგენდარულმა ჯონ მაკინროიმ კი პარიზში ყოფნისას ივარაუდა, რომ სერენამ, შესაძლოა, უიმბლდონის ერთეულთა თანრიგშიც იასპარეზოს, რომელიც 28 ივნისს იწყება.
„ის ასაკში შედის, თუმცა ის ხომ სერენა უილიამსია! დარწმუნებული ვარ, ახლაც რომ ჰკითხოთ, გეტყვით, რომ მთელი ამ წყეული ტურნირის მოგება სურს“. - ჯონ მაკინროი
Queen’s Club-ის ტურნირი მომავალ ორშაბათს აიღებს სტარტს, WTA-ს განცხადებით კი, სერენას მეწყვილის ვინაობა უახლოეს მომავალში გახდება ცნობილი.
„Queen’s Club საუკეთესო ადგილია ამ ახალი თავის დასაწყებად. ბალახის საფარმა ჩემს კარიერაში ყველაზე მნიშვნელოვანი მომენტები მაჩუქა და მოხარული ვარ, რომ სპორტის ამ ერთ-ერთ ყველაზე სიმბოლურ სცენაზე ვბრუნდები." - სერენა უილიამსი
სერენას 2022 წლის აშშ-ის ღია პირველობის შემდეგ, სადაც გულშემატკივრებს დაემშვიდობა, აღარ უთამაშია. თუმცა, მაშინ მან ხაზგასმით აღნიშნა, რომ არ სურდა სიტყვა „კარიერის დასრულების“ გამოყენება და თქვა, რომ ის უბრალოდ ჩოგბურთისგან „ტრანსფორმაციას“ განიცდიდა.
აღსანიშნავია, რომ წყვილებში დიდი სლემის 14 ტიტულის მფლობელმა სერენამ, ტურნირებზე გამოსვლის უფლება თებერვალში დაიბრუნა. მან 6 თვით ადრე გაიარა სავალდებულო ხელახალი რეგისტრაცია ანტიდოპინგურ პროგრამაში, რაც დიდი დაბრუნებისკენ გადადგმული პირველი ოფიციალური ნაბიჯი იყო.
საბოლოო ჯამში, მთავარი კითხვა მაინც ღიად რჩება - რეალურ ტრიუმფს უნდა ველოდოთ, თუ ეს უბრალოდ ლეგენდის დროებითი გაელვებაა საკუთარი სიამოვნებისთვის? 44 წლის ასაკში დიდი სლემის ტურნირების ამბიციით დაბრუნება ერთი შეხედვით წარმოუდგენლად ჟღერს, მაგრამ როდესაც საქმე სერენა უილიამსს ეხება, შეუძლებელი არაფერია. იქნება ეს ტიტულებისთვის ბრძოლა თუ უბრალოდ საყვარელ საქმესთან თბილი დამშვიდობება, ჩოგბურთის სამყარო მზად არის, კიდევ ერთხელ დატკბეს იმ სანახაობით, რომლის ჩუქებაც მხოლოდ მას შეუძლია.
