ჯოკოვიჩს სხეული აღარ მიჰყვება | სერბი რეიტინგის 204-ე ნომერთან დამარცხდა

ნოვაკ ჯოკოვიჩი ფიზიკურ პრობლემებს ვეღარ უმკლავდება - 38 წლის სერბი ჩოგბურთელი, ამჯერად, შანხაის მასტერსის ფინალში ვერ გავიდა. ნახევარფინალში, ლეგენდამ, შეხვედრა რეიტინგის 204-ე ნომერ, მონეგასკ ვალენტინ ვაშეროსთან დათმო (3:6 | 4:6). მატჩი საათსა და 40 წუთს გაგრძელდა.

აღსანიშნავია, რომ ATP-ის 1000-ქულიანი მასტერსების ეპოქაში (1990 წლიდან), ვალენტინ ვაშერო ყველაზე დაბალი რეიტინგის მქონე ჩოგბურთელია, რომელმაც ფინალში გასვლა შეძლო. მას დამსახურება არ უნდა დაეკარგოს, თუმცა ფაქტია, რომ პირველ სეტში, ნოვაკ ჯოკოვიჩმა, ორჯერ მოითხოვა ფიზიოთერაპევტის დახმარება. ნოვაკ ჯოკოვიჩის დამარცხების შემდეგ, ვალენტინ ვაშერო ამ ტურნირიდან მეტ საპრიზო თანხას მიიღებს, ვიდრე მთელი კარიერის განმავლობაში (597 000 დოლარი / იქამდე კარიერაში - 594 000 დოლარი).

ვაშერომ ტურნირი საკვალიფიკაციო ეტაპიდან დაიწყო და ფინალში დანიილ მედვედევსა და არტურ რინდერკნეხს შორის გამარჯვებულს შეხვდება.